E ui ina mamao le manumalo o le Manu Samoa ia Fiti i le taaloga na se‘i mavae atu, peitai ua na o se vaega e ao ina galue malosi agai i ai le susuga i le Faiaoga ma le pulega o le ‘au, aemaise lava o tama taaalo, ina ia mauaa ma faamalosia itu vaivai e pei ona vaaia ma maitauina.
E lē tatau ona iai ni vaega vaivai, poo mea sese sa anoanoai ona vaaia i luga o le malae, i le faataunuuina o le taaloga, pe afai ae agai e feiloai ma ‘au tetele e pei o le Springboks a Aferika.
E ao foi ina lelei ma faatini avanoa e maua ai ma sikoa, pe afai e toe maua ni avanoa faapei ona maua i le uluai taimi o le taaloga ma Fiti.
O le isi foi itu, e ao ina faalelei le tulaga o le pue, ina ia mautu le puipui, ma le taofia o le malosiaga o Aferika i taimi o ana osofaiga.
O le osofaiga muamua a Fiti, na toetoe ina lē mafai e le Manu Samoa, ona taofiofi i luma mai lava o le laina sikoa a Fiti. Ae o lana osofaiga lona lua, sa taunuu ai ma laasia le laina sikoa ina ua lē mafai ona puipui malu le Manu Samoa.
E tele taimi, ma o le taaloga atoa sa fao e Samoa, sa tele foi taimi sa osofai ai ma tele avanoa sa tatau ai ona maua ni sikoa ma faaopoopo ai o latou ‘ai.
Peitai sa maitauina le lē mafai ona faatini ma kolosi le laina sikoa. A fuafua i ‘au tetele ma avanoa sa maua e le Manu Samoa, e ono faitauina ma liliuina o ni ‘ai faaopoopo uma lava ia avanoa.
Sa tatau ona tulimataia le ituaiga taalo sa faaaogā e le alii fulupeki Paul Williams. O taimi uma lava e tamoe ai ma le polo, e tata‘e lava e Paul le pue ma le puipui a Fiti, ma sa manaomia tele ai se isi e faaleoleo ma pipii pea i ai i taimi uma, e pasi ane i ai le polo, ma sikoa ai nisi ‘ai se tele. O le avanoa lea na faato‘ā pueina ma faaaoga tatau e le numera valu a Samoa le alii o George Stowers, lea na maua ai le isi sikoa.
Sa manaia le sikalamu, ma laina i fafo, o molo foi ma le falōina o le polo sa matuā tulaga ese le taumafai o le Manu, peitai e ao lava ina toe faaopoopo i ai se isi lelei e sili atu, ona e ese foi le vaai ma le taalo ia Aferika. O polo lusi e ao foi ina faaaogā tatau ma le poto, auā o suiga ma vaega laiti faapea o soo se taaloga, e ono suia i ni osofaiga, ma maua ai ni ‘ai sa lē fuafuaina, e faaopoopo i taimi faigata o le taaloga.
E tatau ona faaaogā i taimi uma le uigi malosi a le Manu Samoa le susuga ia Alesana Tuilagi. O le itu palaai tele lea o Aferika o le faatautino, ma e ao foi ina osofai i totonu i taimi uma o laina i fafo ma sikalamu, ma taumafai e tutui le numera sefulu a Aferika, auā o le vaivaiga lea o le numera sefulu, e lē mafai ona pue, ma e augata tele e puipui.
O le avanoa tele lea o le Manu, ma lona alavaa e mafai ona sao atu ai i soo se taimi e faatoilalo ai le laina i tua a Aferika.
O le faaaogā o Tuilagi, o le a ave uma i ai le vaai ma le faamuamua a Aferika, ae avanoa ai ma pupu solo la latou puipuiga, maua ai avanoa mo osofaiga ma faatini a le Manu Samoa.
E tatau ona manumalo ia Aferika, ina ia mautinoa ai lona tulaga i le valu aupito i luga mo le sailia o le siamupini.
E leai se iai taunuuga e tulai i ai, o le manunalo lava, ona toe silasila ai lea mo se ‘ai faaopoopo poo le ponesi, pe a mautinoa muamua le manumalo i ai a o faagasolo ai le taaloga.
E telē le avanoa e mafai ona faatoilalo ai Aferika, pe afai e maua le agaga ma le sipili e faatino ai le taaloga i le afiafi o le Aso Faraile o le vaiaso nei. E lē taumate o le a tele ina faaaogā e Aferika le aaina o sala ma drop kiki agai i le pou e vave saili ai ona ‘ai.
O le a lē afaina ia Aferika le taaloga ma Samoa, ona ua mautinoa lava lona avanoa i le quarter finals, ma e ao ai ina faatoatoa lelei e le Manu le faaleano ane a Aferika i le la taaloga.
