Malaga taamilo Le Toa Samoa i le UK
O le alii o Daniel Anderson, ua filifilia nei e avea ma faiaogaulu mo le aulakapi Liki a le atunuu, le Toa Samoa.
O Anderson sa avea foi o se tasi o faiaoga ulu muamua i le ‘au a le NZ Warriors, St Helens ma Parramatta.
O ia o se tasi o alii faiaoga iloga o loo iai i le li’o o faiaoga sinia i le taamilosaga liki a le NRL faapea le Super Liki, aemaise i taaloga faitaulia faavaomalo a le lalolagi i le taaloga lava o le Liki.
O loo ia te ia foi agavaa e faitaulia faatasi ai ma Faiaoga aupito i lelei i le lalolagi atoa.
O le faiaoga muamua sa iai a le Toa Samoa, le susuga o Steve Price, ua faamamulu ese mai i lona tofiga, talu ai lona naunautaiga ina ia taulai lana vaai ma ana tapenaga i lona tofiga o le avea ai ma faiaoga ulu, o le ‘au a St George Dragon mo le tausaga fou 2012.
Ua momoli ai foi ma le faamanuia ma le agaga faafetai, mai le pulega o le Lakapi Liki a Samoa, Rugby League Samoa, i le susuga ia Steve Price ona o lana tautua i le taimi a o avea ai ma faiaoga o le ‘au, peitai e ui ina faamavae ese mai le faiaoga ulu, ae o loo faatumauina pea lona lagolago i le Toa Samoa, i le tele o isi galuega e lē vaaia.
O le galuega o loo ave i ai le faamuamua ma taulai i ai le finaglo o le alii faiaoga fou a le Toa Samoa, Daniel Anderson, o le tapenaina lea o le ‘au mo lana malaga taamilo i UK i le masina o Oketopa o le tausaga nei lava.
E tolu taaloga faavaomalo ua fuafua e faia a o iai le Toa Samoa i UK, e pei ona faatulagaina.
O le taaloga muamua o le a feiloai ai ma le ‘au filifilia, Cumbria Selection i le aso 16 o Oketopa, ona sosoo ai lea ma le taaloga ma le England Knights, i le aso 22, ae faaiu i le taaloga mulimuli ma le ‘au a Aialani (Ireland), i le aso 28 o Oketopa lava.
O le taualuga o le faamoemoe o le alii faiaoga, o le fia ofi atu lea o le Toa Samoa i le taamilosaga tele a le Ipu o le Lalolagi o le a faia i UK, ma o le a talimalo ai ma faatautaia lea taamilosaga e Egelani ma Uelese (2013 Rugby League World Cup).
E tusa ai ma se pepa o faamatalaga sa faamatuu mai i le vaiaso talu ai, o loo faaalia ai le mae’a foi ona filifilia le lisi o tama taaalo o le a malaga mo taaloga e tolu i Egelani ma Uelese.
O le toatele o tama taaalo ua mae’a ona lautogia mo lea taamilosaga, o nisi lava o alo ma fanau o loo konekarate i kalapu eseese i Ausetalia.
O le to’a sefulu ma le tolu e pei ona ua faalauiloaina, o le a amata ai toleniga ma tapenaga a le ‘au mo lana malaga taamilo, peitai e pei ona faalauiloa mai i lea lava pepa o faamatalaga, e iai nisi tama o le ‘au o le a toe faalauiloaina ma fili ai loa le ‘au filifilia mo taaloga e tolu ua faatulagaina.
Ua faamoemoe le alii faiaoga ma le pulega a le Toa Samoa, o le filifiliga mulimuli mo le ‘au, o le a faia pe a mae’a le aso tolu o Oketopa, i le tuanai ma le mae’a ai o taaloga o le taamilosaga a le NRL, ma le Super Liki o loo faagasolo i le taimi nei.
E tolu vaiaso o le a tolauapi ai le ‘au filifilia a le Toa Samoa i Egelani, ma le isi vaiaso o le a tuufaatasia ai i Aialani, a o lumanai ana taaloga e tolu o le a faia.
