O le agaga faafetai ma le faamanū i le Atua o le susuga ia Alex “Lion Heart” Elise Le‘apai sa matuai faatumulia ai o ia e tusa ai ma se talanoaga ma le sui o le Samoa Times.
O le Aso Lulu, aso 30 Iuni na faatumulia ai le Brisbane Entertainment Centre i le maimoaina o le taaloga faitaulia e pei ona fusu ai le siamupini a Ausetalia Alex Le‘apai ma le numera 6 o le lalolagi, ma le alii o Travis “Freight Train” Walker mai Amerika.
Na manumalo Alex i le TKO i le 2 minute ma le 52 sekone o le taamilosaga lona 4, na ta‘u ai loa e Alex ia Travis, “ia ua lava lea faasikuea o lau malaga mamao mai aemaise le aumaimoa, ae se‘i o‘u foi leaga ua tu mai le pasi a le Tuisamau”.
Na faapea lava si tama mai le malō tele ai a foi ma se oso, ae pagā lea e malo lava le moa fanua.
E ui i se umī faasasa‘o maualuga ma tutu‘a o le alii o Travis Walker, peitai e le‘i ‘alo ai le pasasa lelei ai o tu‘i malolosi a Alex i lona ulu lea na semanu e moe ai lava i le taamilosaga lona 3, pe ana lē tāina le logo o le malologa.
Na maua se isi ona malosi na mafua ai ona au atu i le taamilosaga lona 4 ma fai loa i ai Alex, “Sau ia si o‘u uso inā toe foi atu i lou atunuu ae ia onosaia lou loto momomo”.
O le mea mālie na foliga mai e fia malosi mai si alii o Travis Walker i lana tūtū i nai sekone lava na totoe, ae na toatele ē na iloa lelei atu le autilo a si tama i le laufalī (referee Cyril Cairns) e ta‘u atu i ai o ia ua selau lalolagi ua ia vaaia toe nenefu mai ma lana chanel ma ua tauāu ina leiloa se mea se‘i alofa maia, o lea na faalalava ai loa ma lima o le laufalī ma talotalo atu “faamolemole Alex ua lava, ua lava”.
Sa ta‘ua foi e Cairns o lona tomai faalaufalī e na te iloa ai ua manu‘a se tama fusu ona ua lē gata ina faasasa‘o i lalo lima, ae ua faalagolago foi i le mae‘a ma ua lē toe tali atu foi poo ua lē toe fia fusu. E tele tala mālie na vaaia i lea po e pei ona molimauina, ae pau lava le upu a Alex “Viia le Atua”.
O se taaloga mataina e lē gata o le paia ma le mamalu o Samoa ae faapea le toatele o tagata Ausetalia ma isi atunuu sa molimauina.
E momoli ai le faafetai tele i le alii o Alex ona o le saili malo ma le lotonuu aemaise o le lagolago ma le faamalosi a nai ona mātua, le tofa ia Faatau‘i Elisaia ma Leitu Le‘apai faapea uso ma tuafāfine ma le aiga atoa.
O le susuga ia Alex “Lion Heart” Elise Le‘apai e pei ona lausilafia i Ausetalia ma isi atunuu, o le siamupini lea a Ausetalia i le Heavyweight, ae ua see mai nei i le numera 6 i le lalolagi i le fusi o le IBF lea sa mimita mai ai le alii o Travis Walker mai Amerika. O le fusi o le WBO o loo numera 11 ai Alex i le lalolagi.
O le naunau ma le saili malo o lea foi alo o le atunuu o loo ia sisiina pea le tagāvai a Samoa e fai pea ma ona mitamitaga faapea le fu‘a a Ausetalia o loo aumau ai nei.
E pei ona silafia e nisi o mātua o lenei alii fusu lauiloa a Ausetalia ua malaga atu i Laulii i Samoa ona o tulaga tau pisinisi auā le atiina a‘e o aiga.
Ua iai nei le faamoemoe o Aukuso i le masina fou o le a sauni atu ai o ia i le isi ana fusuaga, ma o le tatalo lava i le paia ma le mamalu o Samoa i soo se tafa o le lalolagi ina ia tatou tapuaia le alofaiva o Alex “Lion Heart” Le‘apai i lana taaloga o loma nei pe a tusa ai ma le finagalo o le Tamā o i le lagi.
