E lei taitai ona mae‘a le masina o Novema ae ua amata ona tau manifi atu le faaputuga pepa ulufale i le faafiafiaga a le alii pese lauiloa, le susuga ia Richard Parker. O se tasi foi o alo o le atunuu ua silafia e le toatele i le faagauloto, faamalie loto, faafiafia loto ma le faatagi loto o ana ia foi fatuga.
O nisi aiga e tau misa peitai o se auala talafeagai tele le uluulu mālie atu o le siufofoga o le alii pese ma tuuina atu i le finagalo o se mafine le mālū o ni upu o se pese e toe uma vave ai lava le faalii o le tina ae soso atu e faalelei se misaaga.
Ae tainane la se pese i ni mafutaga, ia ua muliga foi le uluai taimi na tau amata fofoa ai ni tuugatala, ia ua uma upu e toe matafi vave a le faauli ae lagilelei mai se ao pogisa i le toe fegasoloai ma le fesootai o loto pe a oo ina tagitagi atu le siufofoga o Richard Parker i se ulugalii sa tau amata na toulu ai ni timuga ma pa leotele ai le faititili.
E 600 le aofai o pepa ulufale ua faamaonia le leai ma se pepa o totoe ua mae‘a ona faatau ma ua alo atu le mamalu o le atunuu e maimoa ma faafofoga i le alii pese e faagalo ai foi fatia ua alu aemaise le mafatia i galuega o lenei tausaga. O le a faalauteleina lea faafiafiaga pe a mae‘a le faamoemoe o le susuga ia Leautuliilagi Richard Parker i le afiafi o le Aso Toonai, 14 o Tesema i le KP Centre (Tuatusi: Chatswood Road, Loganholme QLD 4129)
