E talitonu e lē o toe po foi malae i le faafofogaaga a Samoa i tafa e fia o le lalolagi. O le Aso Sa, 24 o Novema taimi Ausetalia, na faamanuiaina ai le taaloga a le susuga ia Alex Faatau‘ī Leapai lea sa la fusu ai ma le Lusia, le alii o Denis Boytsov, ma ua faamauina ai le manumalo ma ia umia ai le numera tasi i le lalolagi i le fusi o le WBO.
Na toatele nisi o aiga ma uo na faatalia lona taunuu mai i le malaevaalele i le taeao o le Aso Gafua na sosoo ai, lea na malaga faatasi mai ai ma lona faiaoga ma si ona tuaa ia Faatau‘ī Leapai. O le po o le Aso Faraile na fiafia ai i se siva faafeiloai a aiga foi ma uo, ma sa matagofie lea faamoemoe e ala i le lagolago a tupulaga aemaise nisi o tamalii ma failauga faapea foi le susuga ia Poulava Sam Matautia o le pule o le Uncle Sams Take Away, ma nisi sa faafeiloai le Lionheart i lea afiafi.
Fiafia le tupulaga auā na malie musika a le susuga ia Eric Pepe ma le vaega ma le faaili a le One Sound. O le Aso Lua na tea nei na toe taliu atu si ona tuaa ia Faatau‘ī i Samoa.
Sa faaoo mai se agaga faafetai o le tamā ia Faatau‘ī ma Leitu faapea le nofoaalo e momoli atu le faafetai tele i aiga, uo, le alalafaga aemaise le atunuu e ala i au tapuaiga ua iu manuia ai taumafaiga a le susuga ia Alex Faatau‘ī Leapai ua lauiloa i le Lionheart.
O loo ua faagasolo pea tapenaga auā le alo atu e fusu i le fusi o le WBF ma ua ia maua le avanoa lelei e lu‘iina ai le siamupini o iai nei.
Ua faamauina foi i talafaasolopito o Kuiniselani i tulaga tau taaloga o le a ia fusu mo le siamupini o le paga mamafa o le lalolagi faatasi ma le alii o Wladimir Klitschhko o loo pine auro i le Ukraine’s Olympic.
