E lē o toe mamao se taimi ona maimoaina loa lea e le atunuu le ata tifaga fou ua faaigoaina o NAOMI. O lenei ata tifaga sa pueina ma tuufaatasia e le South Seas Pictures, ma o se ata tifaga ua pueina faapitoa lava mo le Kirisimasi.
O le ata fou lenei e faatatau i le tamaitai o Naomi o loo faatinoina e Loretta Aukuso, na oti lona tina o Sarona o loo faatinoina e Aumua Toafa Teo, a o laititi faato‘ā lima ona tausaga. Talu ai e lei vaai lava Naomi i lona tamā moni, o le mafuaaga lea na vaetama ai Naomi e le tuagane o lona tina o Atapana, o loo faatinoina e Galumalemana Tenari Tautua, ma lona toalua o Lupe, faatinoina e Lealaitagomoa Elsie Ropati. O le olaga o Naomi i totonu o lona aiga sa fai faapologa e Atapana, e lē gata e faapologa i fe‘au ae o tala faalumaluma e lafo ia Naomi.
E ui lava i nei faiga faapologa, peitai, sa mafai lava ona maua le fiafia o Naomi ona o le mafanafana o le latou mafutaga faaleuso ma le fanau moni a Atapana ma Lupe, o le teine o Tiresa faaitnoina e Metotisi Falavaau Komiti, ma Rina o loo faatinoina e Faalagilagi Tuisalega Farani Chan.
Ina ua matua Naomi ma malamalama i le mafuaaga o le faapologa o ia e Atapana, na tonu ai i lona manatu o le a alu ese ma lona aiga, ona e pei lava ia o se tagata ese i uiga o Atapana o loo faaali atu ia te ia.
O le sailiga o Naomi e lona uso o Tiresa na fetaui ai Tiresa ma se tama e igoa ia Leni o loo faatinoina e Pagamalie Iopu Fa‘ivalu. O le taimi foi lea ua lagona ai e Atapana le agaga alofa ia Naomi ma Tiresa lea ua o ese mai totonu o le aiga, ma faapea ai foi ona omai le latou sailiga ma Lupe ma Rina.
E iai le misiterio lilo na o le Atua na ia silafia, peitai, o le po o le Kirisimasi na faato‘ā faailoa ai e le Atua lea misiterio lilo ina ua maua Naomi o loo tootuli ma tatalo i le pepe o le Kirisimasi, ina ia aumai le filemu ma le fiafia o le Kirisimasi mo ia ma lona aiga.
O le tala o loo pueina ai lenei ata sa tusia lava e le tofa ia Tanupo Fiu Fogalevai Aukuso, ma o lenei ata fou sa pueina uma lava i totonu o Aukilani.
Na ta‘ua e Tanupo, o lenei ata tifaga fou, e telē se aoaoga lelei o loo molimoli mai ai, ae laualuga lava i le agaga o le fefaamagaloa‘i ma le teuteuina o lotoifale o aiga a o sauni atu mo le Kirisimasi.
O le pueina o lenei ata tifaga faapitoa mo le Kirisimasi ua faia ina ua toe tolo i le tausaga fou le pueina o le Vaega 3 o le Tuiga, o se tasi o ata tifaga o loo faatalitali i ai le toatele o le atunuu.
O le toatele o i latou o loo iai i le ata tifaga fou lenei o le taimi muamua lea ua o latou faatinoina ai se ata tifaga, peitai, e maeu foi le taleni ma le agavaa o loo maitauina pea i tagata o le tatou atunuu e faatinoina ai ata tifaga.
O nisi o loo iai i le faatinoina o le ata tifaga fou e aofia ai le alii pese o Mr Gago, o le tamaitai o Lana Aoina Tupu mai le La o Samoa Dance Group, o le alii o Sale ma Siulai Faapo.
Na ta‘ua foi e Tanupo o lenei ata tifaga e faatusatusa i le uluai ata tifaga sa pueina e le South Seas Pictures, o le Tautoga Gausia.
Na pueina foi lenei ata ina ia mafai ona maimoaina e le aiga atoa, aemaise taimi e potopoto faatasi ai aiga i toonai o le Kirisimasi ma le Tausaga Fou. O lenei ata o le a amata faatau atu mo le maimoaga a le atunuu i le vaiaso fou.
O Niu Sila, Ausetalia ma Samoa o le a muamua ona maua ai le ata ma faasolo atu ai i Hawaii ma Amerika ma isi atunuu o le lalolagi. I totonu lava ia o Aukilani o le a mafai ona maua se kopi o le ata fou lenei mai le Samoa Video Center i Otahuhu poo faleoloa Samoa e pei o le RSL Henderson, Ulutoa & Sons i Avondale ma Otahuhu, o le Evelina Restaurant i Otara ma Clendon, faapea le Pacific Takeaway i Glenfield.
O isi pitonuu o Niu Sila e pei o Napier, Ueligitone ma Kalaiesetete e susū ane i ou faleoloa masani. Na faailoa foi e Tanupo o loo maua pea le avanoa mo soo se tasi e fia auai i le pueina o ata tifaga.
O loo iai le isi ata tifaga fou o loo faamoemoe e pueina i le masina o Ianuari, afai e fia maua sou avanoa i lea ata tifaga fou, ona fesootai mai lea i le 02102716583 poo le 2764417.
