O se tasi o tulaga ua faatuputupulaia pea le fiafia i ai o le mamalu o le atunuu o alala ma papaaao i le aai o Melepone, o le maimoa lea ma matamata i ata o loo pueina ma faatino i Samoa, o le tasi lea o tautua matavela ua numera tasi ai le auaunaga a le susuga ia Lolua Junior ma lona faletua ia Rebecca, ona e pei o le Jstyla o loo taulamua nei i le molimoliina mai o ata DVD eseese faa-Samoa mai Samoa ma Tutuila, auā le silasila maimoa a le atunuu.
E lē gata i ata fai mea mālie, o faafiafiaga, ae o ata faatino foi o loo toe momoli maia le soifuaga moni o i Samoa ma ona aoaoga matalasi, ae faapea foi le itu tau musika e ala i CD a soo se aufaipese fou o loo ta‘uta‘ua i Samoa, Niu Sila ma Amerika.
Sa tele lava ina faatali Melepone mo ni nai vaiaso talu ona mae‘a faalauiloa ni CD poo ni ata DVD i Niu Sila ma Samoa, ona faato‘ā maua lea i o latou faleoloa.
Peitai ona o le saoasaoa o le silafia ma le tomai faafoe o le Jstyla, faatasi ai ma lo latou agaga tautua mo le mamalu o Samoa o loo faatau ma faaaogā lana auaunaga, o le ala lea ua lē toe faatali ai mo ni vaiaso, ae ua maua lava i le vaiaso lea e faalauiloa ai i Samoa ma Niu Sila, e pei foi o le vaega lua (Vol 2) o le ata o le “Silamanino” na se‘i faato‘ā mae‘a ona faalauiloa, na faalauiloa ma faatau e le Jstyla i le vaiaso lava na faalauiloa ai i Niu Sila.
E mo le silafia e le atunuu, o le Jstyla Production o le auaunaga e pue ai pese ma CD, (Fale Puepese).
O le susuga foi ia Lolua Junior, o le pule lea o le faaili logologoā mo faafiafiaga, le Mt Fao Band, o se tasi lea o ana tautua matavela mo Samoa i Melepone.
E lē gata i lea, o i laua foi ma le faletua o loo pulea ma faatamo‘eina le faleoloa ta‘uta‘ua o le Laufaasolo Shop, lea o loo pito i telē i le aai o Melepone mo C D ma DVD faatau atu, ae o loo pito maualuga lava foi le tupe Samoa e maua mo tupe lafo faamomoli mo Samoa. E lē gata i lea o lana auaunaga i taumafataga vevela ma felesi.
E momoli le agaga faafetai o le susuga a Lolua Junior ma le faletua ia Rebecca i le paia lasilasi o Samoa ona o le lagolago malosi ua aulia ai nei tausaga e tele o la latou tautua mo oe Samoa. Faafetai Faafetai tele lava.
