O le tumutumu ai o le mamalu o le atunuu i aiga, uo ma ē masani ile netball hall i Manurewa ile afiafi o le Aso Toonai 23 o Iulai, na molimauina ai le tāua ma le lagolago malosi o mātua ma aiga ia latou fanau lea ua tuu atoa iai le latou faamoemoega e saili ai se tausala poo se tamaitai e faaauauina le tauaveina o le pale o le Miss Samoa NZ 2016-2017.
E toaono tamaitai lalelei sa fai agai iai le faiga filifiliga mulimuli poo ai o le a nofoia le nofoa o Tavita ma faaauauina tiute tauave o le Miss Samoa NZ e pei ona masani ai. Ose po uigaese lea po ile fiafia o tagata uma, ua lē gata ile sailia ose Miss Samoa NZ ae na faamanatu ai foi male 25 tausaga talu ona faavaeina le Miss Samoa New Zealand.
O le tamaitai ia Tinei Matafai na ia lagiina le vii o le saolotoga o Samoa e tatala ai lea faamoemoe, ae o le susuga ile faafeagaiga ia Rev Apelu Tielu o le Ekalesia PIPC i Papakura na saunia le faamalosi ile upu faauuina ale Atua ma le tatalo amata.
O faafiafiaga eseese na saunia e nisi o alo pepese laiti o le atunuu ia Tinei Matafai, Ephraim Matafai faapea le tamaitai ia Hannah McGrail, o ausiva ale Malu Measina Samoa, o faafiafiaga ale autauva lea sa taitaiina ele Miss Samoa NZ ia Christina Taefu faatasi ai ma le faafiafiaga ale tamaitai ia Latafale Auvaa lea sa avea foi ma Miss Samoa NZ, Miss Pacific Island ma le Miss World.
O le saunoaga a le afioga ile Konesula o Samoa ia Faolotoi Reupena Pogi, na ia momoli ai lona agaga faafetai ile Faatonu o lenei polokalame ia Ulalemamae Teeva Matafai, ile faaauauina pea male tauaveina o lenei faamoemoe i tausaga taitasi ua mafai ai ona faailoa le taleni ma le tomai oloo i alo ma fanau o Samoa e faatino ai tiute i totonu o le atunuu pe a pale mai ile tofi.
O nisi o nei tiute e aofia ai le mafai ona ia faailoa tu ma aganuu a Samoa i totonu o Niu Sila, asiasiga i fale o tagata matutua aemaise foi o i latou oloo iai manaoga faapitoa. O lana faafetai iai latou sa lalagaina ma faavaeina lenei faamoemoe lea ua aulia ai le 25 tausaga talu ona faatino lenei polokalame, ma lana faamalosi i tamaitai tauva, poo ai lava o le a faamanuiaina i lenei tausaga ia faamaoni i ona tiute tauave.
O le saunoaga ale Faatonu o le Miss Samoa NZ ia Ulalemamae Teeva Matafai, na ia faafetai ai ile tapuaiga a mātua ma aiga ona ua aulia le 25 tausaga o faafoeina lava lenei faamoemoe.
E lē sili le ta‘i ile tapuai, ae faapea foi iai latou sa mua i malae i lenei polokalame e pei o le afioga ia Faasavalu David Parker 1991-1993, le afioga ia Sala Sally Newsham 1994-2010, Ulalemamae Teeva Matafai sa filifilia ai loa e avea ma Faatonu seia oo mai lava ile taimi nei.
O le vaega muamua na agai iai le polokalame mo tamaitai tauva o le faailoaina lea o o latou suafa, aoga, galuega, nuu ma tausaga, ona sosoo ai lea ma taleni ma interview poo faatalanoaga ae taualuga i latou siva Samoa.
O Tamaitai Tauva
Rebecca Nielsen
24 Tausaga
Afioaga: Avao, Alamagoto, Vaivase
Galuega/Aoga:
Completed Diploma in Contemporary Music Performance & Works Part Time
Agnelia Brown
23 Tausaga
Afioaga: Lotopa, Faleapuna, Fugalei, Salelologa
Galuega/Aoga
AUT Engagement Coordinator Bachelor of Sport and Recreation
Double Major in Exercise Science & Sport Management
Naomi Eta Fruean
21 Tausaga
Afioaga: Lotofaga, Aleipata, Motootua
Galuega/Aoga
Studying A Bachelor of Commerce
Major in Accounting & Works Part Time
Mariana Tanuvasa
19 Tausaga
Afioaga: Nofoalii
Galuega/Aoga
Studying Performing Arts
Julia Lui
20 Tausaga
Afioaga: Leauvaa, Satuimalufilufi
Galuega/Aoga
Third Year Law Student at the University of Waikato
& Works Part Time as a Barista.
Malae Evile
20 Tausaga
Afioaga: Apolima, Taufusi, Levili, Faatoia
Galuega/Aoga
Studying Commerce & Arts at the University of Auckland
& Works as a Pacific Ambassador at the University of Auckland
Iuga o le Tauvaga
Miss Samoa NZ 2016 – Naomi Eta Fruean
1st Runner Up – Malaea Evile
2nd Runner Up – Agnelia Brown
3rd Runner Up – Julia Lui
4th Runner Up – Mariana Tanuvasa
5th Runner Up – Rebecca Nielsen
O le tamaitai ia Christina Taefu o le Miss Samoa NZ i lenei paeaiga sa ia tauaaoina le talita ma faailoga, faatasi ai ma le pale o le Miss Samoa NZ ile tamaitai ia Naomi Eta Fruean lea ua tulai mai ile tofi e faaauauina le tauaveina o le fu‘a o le Miss Samoa NZ i lenei tausaga seia oo ile tausaga fou.
O se fiafiaga tele i aiga uo ma ē masani a lea alo o le atunuu ina ua tau lau o le faamoemoe ma le manaoga o mātua sa tu‘i ai le mulipapaga ma tapuaia faiva o le tamaitai ia Naomi Eta Fruean.
