Ua mafai ona faaulutalaina lenei tusitusiga i le fuaiupu o loo i luga, e fai lea ma pine faamau i le mafuaaga na faaifo ai le lagimalofie i le susuga Joshua Saua, ma le susuga Rimoni Malo Leota.
O nei tamafanau a le atunuu o loo faapea ona ofoina atu o laua soifua e tautua ai le Malo o Niu Sila e ala lea i lana fitafita tau.
O i laua lava foi nei sa malaga atu i Samoa mo le faataunuuina o le galuega fesoasoani i le vaitaimi o le sunami lea sa malaga ai i Samoa ni isi mai le fitafita a Niu Sila.
Ma a o iai i Samoa i lea foi vaitau sa feagai ai le atunuu ma mafatiaga o le sunami, sa faapea ona faaosofia ai i laua i le naunau lea ina ia o la laeiina le tatau a Samoa.
O se vaaiga sa faapea ona o la maitauina i totonu o le atunuu le toatele o nisi o sogaimiti, ma o inā la sa avea loa ma mafuaaga o lenei moemitiga, ia pe sa momoo mai ai loa ina ia lata mai se taimi o le a faapea ona ta ai ni a la tatau.
E ui ina ua tuanai atu le tausaga talu mai lea malaga i Samoa, ae sa ola pea le miti ma moomooga sa faananau i ai. O le ala lea o le tuua ai foi o le nofoaga a le fitafita o Niu Sila o loo faapea ona faamautu ai i Palmerston North, ae agai mai mo le faataunuuina o a la faalepo.
O le isi itu mataina ona o nei alii, e ui lava o o la faaiu o ni Samoa, ae matuā foliga papalagi lava auā o o la tina e palagi a o o la tamā o Samoa. Lona uiga e lē faigofie ona iloa o laua o ni alii Samoa. Peitai o lo la laeiina nei o le tatau a le atunuu, ua matuā matilatila ai nei lo la faasinomaga o laua lava o sogaimiti Samoa.
O le susuga Mareko o ia lea sa nafa ma le faaifoina o le lagimalofie, ma e sefululua aso sa faatinoina ai le galuega mo le susuga Joshua ma Rimoni.
O le Aso Toonai la na se‘i mavae atu nei sa faapea ona samaina ai nei galuega e lua, lea sa faataunuuina i le hall a le Ekalesia Metotisi i Papakura.
O le susuga Magele Masua sa feagai ma le aso i lona faatautaiga, ma o se faamoemoe sa ‘oa ma tamaoaiga i lagona eseese ona e maofa le lototetele o nei alii, lea lava ua faaiuina ai ma le manuia o la faamoemoe.
