Ua amata galuega o lenei tausaga 2018 ale Minisita o tagata Pasefika, Afioga Aupito Su’a William Sio, ile tāpā ole fesoasoani sili mai luga, e ala ise sauniga na ta’ita’ia ele afioga ia Patele Father Michael Endemann.
Ole Salamo 127:1 na faaautu iai manatunatuga o taiala o lenei tausaga, ile faamalosi ale ta’ita’i ole sauniga ia Father Michael, “Afai e lē atiina ae e Ieova le fale, e galulue fua i latou o e atiina ae, afai e le leoleo e Ieova le aai, e mataala fua o lē nate leoleoina”.
E lei tele ni upu ole faamalosi ale ta’ita’i ole sauniga e tusa ma lea fuaitau ale afioga ale Atua, ona oloo manino lava le mea oloo talanoa mai iai le upu ole Tusi Paia, ae ole itu tāua, ia iai le Atua ile fausiaina ma le atinaeina ose galuega. Ole faamalosiau tāua lenei mo le Minisita o tagata Pasefika aemaise ta’ita’i ole pitonuu o Magele.
Na ta’ua e Aupito, “Ose taimi muamua lenei ua amataina ai se faamoemoe e ala i talosaga ile Atua auā galuega ole tausaga (prayer breakfast) ose itu na faufautua mai ai tamā matutua ole vaega faaupufai ale Labour”.
“Oute talitonu ose itu tāua tele foi le amata mea o Magele i lenei faamoemoe, ona ole itumalo lenei o lea oute tulai atu ai ile Palemene ile taimi nei, ona faasolo atu ai lea i isi pitonuu le faatinoina ole faatāua ole faatagisia ole Atua i galuega fai.”
“Ole mea muamua i lo’u manatu, ole vaai muamua lea e faaleleia lo’u lotoifale ona faagasolo atu ai lea i tua, ole mea lea ua amata mea ai Magele ma valaaulia ta’ita’i o Magele ona e afua mai mauga le manuia ose nuu. A lelei le faavae o ta’ita’i e lelei foi ma manuia ta’ita’iga”.
E lē na’o ta’ita’i o Magele sa auai i lenei faamoemoe ile Aso Toonai, sa auai ai foi ma nisi o ta’ita’i mai ekalesia taitasi o isi pitonuu o Aukilani, ina ia fusia faatasi manaoga ma tuuina atu ile Atua mo lenei tausaga 2018.
O nisi o anavatau fia faataunuu ale faigamalo ale Labour i lenei tausaga 2018, na saunoa iai le afioga Aupito Su’a William Sio, ma ia talosagaina ai le tatalo a ta’ita’i o ekalesia sa auai i lea faamoemoe ile taeao ole Aso Toonai.
Na saunoa manino le afioga ile alii Minisita, e tele fuafuaga ale faigamalo mo lenei tausaga, aemaise le tolu tausaga muamua ole paeaiga oloo fia faia ai suiga ma le faamoemoe ile Atua ma lona mana.
Na lu’i foi ele minisita tagata Pasefika ma i latou sa auai i lea faamoemoe, e fesoasoani e unaia o latou lotoifale oloo galulue ai e faailoa ma faaaogā le avanoa ua tatala ele malo mo aoaoga maualuluga e aooga fua ai fanau, lea e amataina ile tausaga nei.
Ose itu e toe unaia ai fanau ole Pasefika i aoaoga ma faaaogā tatau le avanoa auā se lumanai manuia o tagata Pasefika aemaise ole siitia lea ole tulaga o tagata Pasefika ile ola aoaoina.
A lelei le tulaga o aoaoga ole a fesoasoani tele lea ise lumanai manuia o tagata ole Pasefika, ole faanaunautaiga lea ole afioga ile Minisita.
Ole aganuu a tagata Pasefika le tasi o itu oloo iai se galuega oloo fia galue mai ai le afioga ile Minisita e fia aoaoina ma faailoa i tagata Pasefika, ina ia silasila e faatāua tau ole aganuu e iai lona aogā ma fesoasoani e atinae ai aiga, ae aua le soona aapa ile itu e lē ogatusa ma le soifuaga i Niu Sila.
Oloo iai le faanaunautaiga ole minisita ia ola manuia tagata Pasefika ma ia o latou faatāua avanoa ua tuuina mai ele malo, ma ia ao foi ona aoaoina tagata Pasefika faapea tagata Samoa i nei avanoa, ma taiala e lima ta’ita’iina ai le ola manuia. Afai e fia manuia tagata Pasefika i faamanuiaga ole tulai mai ole Labour, ia o latou unaia avanoa ma faatāua fuafuaga ale malo mo le agaigai i luma.
Na faaiu upu ale minisita e faapea, “E lē o ia te au se tali, poo le malo se tali, ole tali oloo ile tatou galulue faatasi auā se manuia o tatou tagata.” Ia faamanuia mai le Atua i galuega o lenei tausaga 2018.
