Ua toe tulai malosi mai nei le aoga tusi ata ale BEN Beautiful Expressions of Nature, ale Susuga Papalii Penehuro, faapei ona maua atu i foliga o Nafanua ua amata ona ataata mai ile ‘alā telē oi le ata.
Ole aoga lea nai Lelata ile tele o tausaga ua mavae, peitai na faaleagaina uma ele afā o Eveni ile 2012 ma toe amata mai ai nei i lona nofoaga fou i Vaitele. Ole fanua ua iai nei, oloo lisi mai le malo.
Peitai ua oo ile taimi e tapena ai mo le a’e o aoga, na talanoa ai Papalii, ua agavaa ona toe amata le aoga tusiata mai Vaitele, ma ua amata ona tatala le avanoa i fanau ma mātua e lesitala o latou alo ile aoga tusiata ale BEN.
Ua tele suiga ole aoga ua iai nei ina ua mafai ona laasia le isi laasaga fou, ole vane mai lea o ata mai ‘oa oloo laupae i luma fale ma tuafale, faapea laufanua o Samoa, e pei o maa poo ‘alā ma papa.
Ile talanoa a Papalii, o auala faaonaponei e liua ai mea vaivai ise mea malo, poo se mea malo foi ise mea vaivai.
Ole manatu maualuga o Papalii ia uma loa le aoga ma faafaigaluega loa tamaiti aoga. Auā e leai se aogā ole aooga o tamaiti, ae iu atu e leai se mea e faia e faaaogā iai le tomai ua maua.
Na ta’ua foi e Papalii e lē o mafai e le toatele ona faia galuega mamafa nei, ole tele o tamaiti e filifili i galuega e faigofie ona faatino.
Ua faamautu mai foi e le alii faiaoga ia Papalii, a a’e loa le aoga, ona faaauau atu ai lava lea ma faasolo atu ai lava ina faafaigaluega ai ma le tamaititi aoga ile atina’eina o lea foi matata i totonu o Samoa.
E tele ata eseese ua amata ona faamata’osi mai ‘alā ma papa oloo laupae ai nei ile fanua ole BEN i Vaitele. “O auro ia ma ario, o penina tautele ia ma ‘oa ole tatou laueleele oloo faatalalē iai le toatele ma lē amanaia.
Ae o nisi nei o ‘oa lilo oloo tatanu io tatou laufanua, pei ona faamatala le alii tusiata ua oo nei iai lana galue. Ina ua uma atu le taimi o laau ma ogalaau, sa vane mai ai faatagata. Na saunoa foi Papalii e faailoa le eseesega ole faatagata e vane ile laau ma le faatagata e vane ile maa. Auā ole laau e au lava ina pala ma lē toe aogā, peitai, ole maa e faavavau lava, o lona uiga e faavavau foi le umi foi ose talaaga ma lona uiga ose ata e vane ise maa.
“Ua faitau tausaga nei talu ona mavae atu le afā ole 2012, ae sa lei mate ai le faamoemoe ma le manaoga, ia taumafai lava e faufau mai lenei galuega i mea o maua ile fanua.”
Ile molimau ale Tusitala, ole fanua lenei ole BEN i Vaitele, e tumu i atigitaavale, o atigi apa, o atigi nofoa, o uamea o fale tetele ua tala i lalo, o atigi uilipaelo, o nofoa tulei ua lē toe aogā, ma uamea o nofoa lapisi mai le Mapuifagalele, o moega ua gaui, o faitotoa ma soo se ituaiga o uamea sa taetae uma ma faamaopopo ele susuga Papalii, e fausia mai ai se isi oloa tāua.
Ole taimi nei ile malae ma le lotoā ale BEN, ua laumamā atoa le lotoā ina ua pe le vao, ae ua aliali mai i ituala uma e lua, le malae e laupae i ‘alā ma le mau atigi o meafale ua lē toe aogā i isi tagata, ae oni oloa tāua mo le aoga tusiata.
Ole Aso Toonai na tea nei, na amata ai ona gasolo atu tupulaga talavou, ua iai le manaoga e fia aooga pe a tatala le aoga lea ua amata ona galue ai le tamaitai o Lavenia, ole tauaiga ole Susuga Papalii, e faamaumau fanau ole a manuia i avanoa.
Ole aso 8 o Fepuari e faagata ai le lesitalaina o suafa ma amata atu ai loa le aoga ile isi lua vaiaso e sosoo ai.
