O le soifua saoloto ma le faaaogāina o aiā tatau a soo se Samoa iinei faapea tagatānuu o Ausetalia o se tasi lea o mafuaaga na tatalo i ai ma molimoli aloaia ai se teufugalaau aualofa e le Fono Aoao ma le Ofisa o le Konesula mo i laua na maliliu i se osofaiga faaterorisi i le faleaiga o le Lindt Cafe i Sini.
O le afioga i le Konesula ia Fonoti Manogiamanu Etuale Ioane faapea le taitaifono o le Fono Aoao na auai atu e momoli se teufugalaau ma fai ma sui o tagata Samoa i Sini nei e manatua ai pea le aso na lepeti ai e le fili ma le faatupu faalavelave femalagaa‘iga ma le gasolo atu o tagata lautele i galuega i aso taitasi. E ui e leai se Samoa na aafia i lenei osofaiga ae o magaala lava nei o le taulaga i Sini e feafioai ai le tele o nai o tatou tagata i galuega, nofoaafi, taavale laiti (taxis) aemaise pasi la‘upasese.
E le gata i le molimoli o faamaisega mo aiga o i laua na maliliu ae na faailoa ai foi le agaga tutufaatasi o lo tatou atunuu i Sini nei faapea le fono aoao ma lagona faapea manatu o Ausetalia atoa.
O se avanoa foi sa momoli ai se talosaga i le mamalu feafioai ia mataalia, faaeteete ma tausisi i le saogalemu i taimi uma.
Sa vaaia foi aiga Samoa taitoatasi na autovaa atu lava e momolia a latou alofaaga ma teufugalaau i lenei tuufaatasiga o loto ma agaga mo Katrina Dawson faapea Tori Johnson na maliliu i le osofaiga.
I nisi o manatu na talanoaina sa talitonu nisi semanu e leai ni soifua e maimau i lea faalavelave pe ana faapea na iai se alo o Samoa leoleo (security) faitotoa na i totonu o lenei faleaiga.
