E toatolu suli o le aiga o sa Aueluā i Lepa i Aleipata na faaee i ai le suafa Auelua i se sauniga e lua aso na faatautaia ai ma faaiu ai le tausaga na se‘i mavae atu nei 2014, i galuega faatino a lea foi aiga o le atunuu.
O le afioga i le alii Palemia, le susuga Tuilaepa Lupesoliai Sailele Malielegaoi le tasi o le toatolu na faaee i ai lea suafa.
O le isi toalua o Malaeāfoa Tuvale Auelua o loo alala i Ausetalia ma le tamaitai o Josie Muliaga Mamaia o loo galue i le faalapotopotoga o le Toomaga mo ē Puapuagatia i Apia.
O le Aso Faraile na i le afiafi na faatautaia ai le sauniga lotu o lea nofo ae o le saofai na faatoa faataunuu i le taeao na sosoo ai o le Aso Toonai.
Na tumutumu ia sauniga e lua e pei ona molimauina e le aiga, o le afioaga, le itumalo ma malo usu. E oo lava i le Aso Toonai i le afiafi o gasolo atu lava malo usu ma na faapea ona tali uma e le aiga na auai faaaloaloga o i latou na oo atu e molimauina lenei foi vaega o sauniga a lea aiga.
E toatele i latou ua malaga mai i Samoa auā le faatinoga o saofai, o faaulufalega, o mafutaga a aiga poo reunions, ma o se tasi lenei o tausaga ua vaaia le toatele o tagata lava o si o tatou atunuu ua malaga mai mo nei tuufaatasiga. Ona pau lea o le taimi ua maua e le toatele auā le faatinoga o nei faatasiga mo aiga.
O le alii Palemia o loo ua pale foi i le suafa Fatialofa ma Tuilaepa mai i Lepa lava ma o lea ua faaopoopo i ai ma le suafa Auelua.
