Ua faamaonia mai e le Komesina o Leoleo, Leaupepe Fatu Pula le molia ai o le faatonu o le nusipepa o le Samoa Observer, Savea Sano Malifa i le moliaga o le ave taavale onā. O lea faalavelave na tulai mai i le po o le Aso Tofi o le vaiaso na tea nei i Malifa.
Na fesiligia foi Leaupepe i le aso e fofogaina ai lea mataupu i luma o le Faamasinoga ae na ia ta‘ua, ua ia lē mautinoa lea itu. O le tulaga mautinoa, sa faasuaavā le afioga ia Savea ma o le ala lea o le tulai mai o lea faalavelave tau taavale.
E lei iai se isi na aafia pe manu‘a ai i lea faalavelave, ae na manino lava le motusia ai o nisi o laina eletise i nofoaga i le taulaga o Apia. O le taulaga atoa na motusia le eletise a o feagai ai le Asosi Netipolo ma lana faaaliga o laei e saili tupe ai mo a latou sauniga mo taaloga faavaomalo.
E tele potopotoga o Bingo na motusia faafuasei ona ua pepē molī ma masini bingo. O nisi na faapea ona tafafao i lea afiafi na toe vave ta‘ape mai i fale faafiafia ona o le motusia o le eletise. O se pou molī i Maluafou lea na lavea lelei i le taavale lea. Na motusia ai foi ma le faasalalauga a televise ma leitio i lea lava po.
O le lipoti a le Samoa Observer e faapea o se laau na taia e le taavale, ae na maua e le tatou ofisa i Samoa, o le pou molī lea e faapipii ai se transformer, na lavea ma na vave ona agai ane le malosiaga tau eletise ina ia foia le faafitauli.
Na faapea foi ona maua i lipoti, na ave ai lava le Afioga Savea Sano i lea afiafi i le maota gasegase ina ia siaki mo ni manu‘a ia te ia, ae na toe avane foi mo le fesiligia i le Ofisa o Leoleo i Apia.
Ua maua foi e le tatou ofisa o se aso o le vaiaso lenei e tulai ai Savea i lenei moliaga pe tulai foi sana loia.
