• Aisea ua toe faaleaga ai le KiwiSaver?
• O fea folafolaga sa faia a o lei faia le faigapalota, ‘E lē tagofia pe sii le lafoga o oloa (GST)’?
• E agavaa le National mo le taitaia o le malo, mo le isi tolu tausaga muamua?
Ua soona nunumi le lalolagi o mafaufauga ma faatatau a le toatele o tagata o Niu Sila, ona o le alia‘e o faiga taufaaoleole sa natia e John Key ma lana faigamalo, mai lava i le taimi na seei ai mo le taitaia o le atunuu i faiga faapolokiki.
O le toe suia e le malo o teugatupe ma faaputugaoa i lalo o le polokalame o le KiwiSaver, ua taunuu ai le upu a le atunuu, ‘Ua togi le moa ae uu le ‘afa’.
A lē o lea, ‘Ua faapili le namu, ae folo atoa le kamela’. Sa manino lava i finagalo ma le faafofoga a tagatānuu o Niu Sila, folafolaga a le alii palemia o John Key ma lana vaega faaupufai a o sauni le faiga filifiliga e ala i le palota tele i le tolu tausaga ua mavae. Sa saunoa ai John Key e faapea, e lē toe tagofia e lana faigamalo le KiwiSaver, pe afai ae tulai mai e tauave ma taitai le atunuu.
Sa ia faamautinoa i lana saunoaga, o le a lagolago e le National lea foi polokalame tāua sa amata mea ai le Labour, a o tulai i le faatautaiga o upufai o Niu Sila. O le isi polomisi a John Key sa faaleoina faalauaitele i le vaitaimi lava lea a o lumanai le faigapalota tele talu ai, ‘O le a lē toe tagofia foi pe siitia le lafoga mo le tau o oloa (GST)’. Peitai ua mu le lima, ma ua toe tapa i le iofi.
Ua fusi foi le fusipau, ma ua fiu e falō ua lē soo. Ua toe tata‘e le polomisi muamua, toe tata‘e atu ai ma le polomisi lona lua. Pe o le a faapefea nei isi polomisi o totoe? Ua mae‘a ona sii le lafoga mo oloa ma fefaatauaiga, a o lea foi ua toe aapa e sui ma le KiwiSaver, e ala i le toe taofia ma aveese faamalosi le fesoasoani a le malo sa tuuina i totonu mo le faamoemoe na mafua ai ona faavae le faaputugaoa o le KiwiSaver. Ua lē gata ina fesiligia e tagata, ae ua matuā popole foi le toatele i faiga ma polomisi a le palemia ma lana faigamalo, pe o iai se lumanai pe leai foi.
O le isi polomisi a le alii palemia ma lana vaega faaupufai, ‘O le tipi lea poo le faaitiitia o lafoga totogi a tagata faigaluega (Tax Cut)’. E moni ua mae‘a ona faataunuu, peitai ua sili atu ona mafatia tagata lautele o le atunuu, i le taugata o le lafoga o fefaatauaiga (GST), nai lo le lafoga faaitiitia mai totogi o tagata (Tax Cut).
O le vaega tonu lava lea na mafua ai ona tu‘i fesili e le vaega faapufai a le Labour John Key ma lana vaega i le taimi tonu lava o faiga faatosina a o lumanai le palota talu ai. Na fesili le Labour, ‘Pe faapefea ona faatino e le National le tipi o lafoga a tagata faigaluega, ae leai se siitaga o lafoga o oloa ma fefaatauaiga?’
Na malamalama lelei Helen Clark ma lana faigamalo, e lē taitai mafai, ma e leai foi se malo e tulai mai e mafai ona faatinoina le folafolaga sa faaleoina e le National i lena vaitaimi, pe afai ae maua so latou avanoa e taitai ai le malo o Niu Sila. Na fesili foi le Labour e tauala i le Minisita o Tupe sa iai, Michael Cullen, ‘Poo fea e aumai ai e le National tupe e faatino ai a latou folafolaga sa faalele.
E faapefea ona faatupeina le tele o polomisi ua fai ma faatosina ai tagata o le atunuu?’ Na valoia lava foi e le vaega faaupufai a le Labour i lena vaitaimi, le pepelo ma le lē moni o folafolaga a le National. Sa ta‘ua e le Labour e faapea, na pau lava le tulaga o loo manao i ai le National, o le fia faatoilalo o le Labour ma lana faigamalo, ae fia taitaia le malo, ona maua ai lea ma lo latou avanoa e fai ai suiga i polomisi pepelo sa pisapisao ai.
O faiga ma suiga e pei ona ta‘ua, ua aliali ai e foliga mai e lei iai ni fuafuaga ma se tofamamao a John Key ma lana vaega faaupufai, mo le tauaveina o le avega sa i tau‘au ma le ua o Helen Clark ma lana vaega a le Labour.
E lei a‘oa‘oina, ma e lei lava tapena ma saunia le National mo agavaa e tatau ai ona taitaia ma faafoeina le malo.
E foliga mai, sa na o le faitio lava ma faifaiupu i le tele o mataupu ma taumafaiga a le Labour sa fai, ae leai ma se manatu e a‘oa‘oina ai se mea lelei, auā e iai foi lo latou lava taimi.
O lea la ua oo i lo latou taimi, ae ua matuā leiloa migoi, leiloa faatino le faaauauina o galuega sa fausia ai le malo ma lona atina‘e. A silasila toto‘a i gaioiga ma folasaga a Minisita taitasi, e aofia ai ma le alii palemia, ua matuā tautino ma ua atagia mai lava le lē agavaa ma le faaletonu i le taimi nei, ae a faapefea la le lumanai pe afai ae toe filifilia ma toe tulai mai? O le toe tata‘e o ni polomisi ma ni folafolaga sa faia, o se tulaga maualalo tele lea ma le ta‘ufaatauvaaina, auā ua mautinoa ai le leai o se tofa mamao ma se faiga mautu e faatino ai upu ma tala sa faalele ona o le manao i le tofi ma le malosi faalemalo e pulea ai upufai.
Ua na o se faatupu manatu, ma se toe fafagu ina ia toe silasila ma toe tagai toto‘a i ai tagata Samoa ma le Pasefika, poo ai tonu o loo matuā mafatia i faiga ma fuafuaga a le National e pei ona tulai mai i lenei vaitaimi, a o loma ai le isi faigapalota tele a le atunuu.
Suiga na faia e le National talu ona tulai mai i le malo
1. O le mea moni, ua faoa le aogā ma le autū o le polokalame tāua o le KiwiSaver, ina ua folafola le toe taofia o pasene sa fesoasoani ai le malo, mo le vave faatupulaia o saofaga ma teugatupe a tagata mo le KiwiSaver.
2. Ua toe fao ese foi isi tupe sa faamāmā avega i tagata, talu ona sii le lafoga o oloa ma fefaatauaiga (GST).
3. Maunu tagata i tupe o faasaoina mai i le lafoga sa aveese ma faaitiitia mai totogi o tagata faigaluega, ae toe faatumu ina ua sii le GST.
4. Faaitiitia penefiti sa fesoasoani mo tagata lautele mai le Matagaluega o alagaoa ma le manuia o le atunuu (WINZ).
5. Ua siitia le tau o lesitala ma pepa mo femalagaiga o taavale i luga o auala tele.
6. Aveesea ma faaitiitia le faaaogāina e tagata lautele o galuega ma auaunaga lē totogia a Loia, sa fesoasoani ai mo tagata e vaivai tupe maua (Legal Aids).
7. Faaitiitia fesoasoani mo taui o faalavelave faafuasei (ACC).
8. Aveesea aiā tatau a tagata faigaluega e finauina ai mataupu agai i pule o kamupani ma falefaigaluega.
9. Aveesea ma faaitiitia le malosi mai Iuni a tagata faigaluega (EMPU), e galulue faatasi ai ma tagata faigaluega ma faatino a latou aiā tatau.
10. Tapunia le tele o auaunaga mo le soifua maloloina o tagata lautele, sa faafaigofie ai ona maua fesoasoani ma fautuaga talafeagai.
11. Suiga i fale mautotogi o le malo (Housing NZ).
12. Suia nisi o tulafono mo femalagaiga faavaomalo (Immigration policies).
E tele nisi suiga e mautinoa o le a toe agai foi i ai le National, pe afai ae toe manuia mai i le isi faigapalota o loma nei.
E mafai ona taofia uma ia suiga e lē talafeagai ma tagata Pasefika ma le toatele o tagata lautele, pe afai ae fai ma le poto, ma filifili tatau lau togi mo le vaega faaupufai e te palota i ai mo le lumanai.
