O le aso ua faia e Ieova e olioli ma fiafia ai, ua avea foi ma taeao fou o le viiga o le Atua e ala i ana faamanuiaga ua sasaa i luga o lana Ekalesia. Ae o se amataga fou foi ua faailoa ai le sosia ma tamaoaiga o loo i totonu o le galuega a le Atua e ala i meaalofa ma taleni ua faaaogāina ai le fanau.
O le Aso Sa ua mavae, 5 o Iulai na faia ai se sauniga tele i le malumalu o le Ekalesia PIC i Avondale e faapaiaina ai le togiga a le aufaipese faatasi ai ma le piano auā lava le faaleleia atili o viiga o le Atua, ae lē gata i lea o nisi o fanau o le Ekalesia ua mafai ona faaaogāina le taleni ma le meaalofa i totonu o le failipu.
Na auai nisi o uo ma ē masani faapea foi nisi o auaiga o le Ekalesia e molimau faatasi lea tapuaiga. O le taitai o le sauniga o le susuga i le faafeagaiga ia Rev Asola Amosa ae o le faitauina o le afioga a le Atua i le Feagaiga Tuai na fofogaina lea e Vasaifanua Aukuso ae o le Feagaiga Fou o le susuga ia Tagaloa Pilitati Aveau, o viiga o le Atua na peseina lava e siufofoga mālie o le aufaipese.
O se sauniga mamalu ma le galue o le Agaga o le Atua a o tulai lana auauana i le taitaiina o le sauniga, ae faapea foi i le taimi na tatalo ai le auauna e faapaia i le togiga, o le piano faapea sui fou o le faili.
Na faaiu le tatalo o le faapaiaga i le pese na usuina e le aufaipese ua avea o se ietoga e ufitia uma ai tapenaga mo le galuega a le Atua. Ae o le maualuga ma le sini autu o lea aso o le mānavaina o le upu folafola a le Atua, na saunoa i ai le taitai, Ia fai ma viiga o le Atua nei tapenaga, ma o se amataga fou e toe manatu ai i le alofa o le Atua i mea ua ia saunia auā le lelei o ona viiga ua faaaogāina ai lana fanau.
Faatasi ai ma le soifua maloloina e tatau ona maua e le tagata, ia iai le mafaufau e fafaga i le upu a le Atua, o le agaga ia iai Iesu i totonu o le loto, ma le tino o le galuega lena a le tagata e fai ia tausi faalelei. Na faaiu le sauniga i le faamanatuga ma sosoo ai ma le toonai na saunia lava e le Ekalesia.
E 70 sui o loo i totonu o lenei aufaipese, ma o nei tapenaga uma i togiga ma le piano o sene a le aufaipese na lafo i vaiaso taitasi faatasi ai ma le latou lafoga mulimuli na lafo e ta‘i $50 a le tagata faigaluega na maua ai le tupe atoa na faatunuuina ai loa le faamoemoe a le aufaipese.
E $11,990.00 na faatauina ai le togiga ae o le piano e $7,000.00. O le susuga ia Aeau Lealofi Peter o loo taitai pese i le itupa o alii ae o tamaitai o le tina ia Tamalii Laloaega Aumua. O faiaoga o le susuga ia Tagaloa Pilitati Aveau, Faavaeonuu Naama Tuisuga ma Ashley Tuaitau, ae o le taitai faili o le susuga ia Tofa Tofia.
O le susuga i le aoao ia Tuaimalo Matamua o loo taitaia le Ekalesia i lalo o le taitaiga a le toeaina ia Rev Apelu Tuai Funaki.
