E ui ua lē taulau le taumafaiga a le tatou Manu Samoa 7 i taaloga a malo o le Taupulega i Glasgow Sikotilani e pei ona faagasolo nei, ma ua mae‘a foi le taamilosaga ua leai se pine, ae talitonu le manatu sa matuai faafiafiaina le tapuaiga a Samoa i le taaalo a tama pei ona sa molimauina i le faaiuga o le vaiaso.
Na lē taumate lo tatou sao mo se tulaga lelei ma le faamoemoe mo se pine i taaloga a le Commonwealth mo lenei tausaga, na mafua lea masaloga ona o le mataina o le gaioi a le Manu i ana taaloga uma o le Pool C lea sa taaalo faatasi ai ma Wales, Papua ma Meleisia ma sao ai i le quarter final o le ipu autu.
Saili lea ma le ‘au a Egelani mo se avanoa e sao ai i le Semi Finals, ma manumalo ai i le ‘ai e tasi le Manu Samoa, 15 i le 14 a Egelani. O se tasi nei o taaloga finau ma le matagofie i le matamata, o le taaloga foi lea na faatepa ai e Lio Lolo le lalolagi, i se sikoa ua faaaogā ai loa apaau o le Manu, lele i luga ae tatao le polo i le tulimanu.
Na matuai taufai ofo le aufaasalalau o taaloga i le mea ofoofogia lea na faaofo ai e tamaiti o le Manu le aumaimoa. Semanū lava e tele foi ni ‘ai e ono manumalo ai Samoa ia Egelani, pe ana ova uma aa o sikoa na maua. Fai lava si faafaigata ona fafao se polo i le pou, ona o le tele o sikoa nei, na tatao uma i le tulimanu. Ae lē afaina, o le manumalo lava o le manumalo lava, pe tasi le ‘ai e va pe tele o le tulaga taulia ua sao i le Semi finals.
Na sao atu le Manu Samoa ma taaalo ma Aferika i le Semi Finals, tamomoe ai loa vaalele a Aferika ma faanenefu si a tatou ‘au i ‘ai e 35 i le 7 a le Manu. O le maitau i le masau o le taaloga i le faatamoega e le ‘au a Afelika, e matautia le sau lea e faatamoe ai le polo, o le gaioi ma le vave o le pasiga, faaopoopo loa i ai ma le saoasaoa ma le fiu e pue, lea la na tatou vaai i ai, e leai se ‘au e ono faafetauia, e oo lava ia Niu Sila, lea ua taai ai fala.
Pei ona silafia o Aferika lea ua manumalo nei i le pine auro ina ua faia‘ina ai Niu Sila i le sailiga siamupini o le ipu autu, i ‘ai e 17 i le 12 a Niu Sila. See mai lea o Samoa e sue tulaga ma le pine apamemea ma le ‘au a Ausetalia, peitai ane ua lē manuia le latou taumafai.
E 24 Ausetalia i le leai a le Manu Samoa, taumate nisi pe lē ua vaivai ea nai tama. O lea la ua tulaga 4 Samoa i le Commonwealth Games i lenei tausaga, o se tulaga maualuga pe a fua atu i le tele o nisi taamilosaga ua mavae sa maualalo lona tulaga i le faatulagaga o ‘au a le lalolagi.
Peitai e manatu nisi ua matuā aogā le toe aami o tama tuai e pei o Lolo Lui ma Afa Aiono, lea ua toe tau maua mai le taalo lea sa iai le Manu muamua, e ui e na o nai faaletonu laiti lava e tatau ona toe iloilo ma silasila i ai le pulega, toe atoatoa loa le malosi e lele ai le tatou Manu Samoa.
Ae faamalo le taaalo tausaafia, faamalo foi le tapuai faatamalii!
