E tulaga maualuga pesega faa-Samoa ona o la tatou tu ma le agaifanua o le faaaloalo ma le avafatafata, aemaise o le silasila i le Atua ma le soifua kerisiano, a mālie upu ma manaia le fati paleni ma leo o mea faili, ona tosina lea i ai o le faalogologo ma amata pese ai.
O nisi o tamalii pepese iloga o Samoa e faipaaga pea ma le tautua a le Levina Records i le aai o Melepone, o loo pulea e le susuga ia Levae Levae ma le faletua ia Evelina, ua loa tausaga o tautua lenei tamalii i le pueina ma tuufaatasia le tele o CD o loo faafofoga i ai lo tatou atunuu.
O le taimi nei o loo faagasolo le pueina o se tasi o CD lotu a le susuga ia Misiluki Su‘a faatasi ma lana MTV, faapea foi le susuga ia Aniseto Falemoe. O nisi o tamalii e fiafia e galulue ma le susuga ia Levae o le susuga ia Richard Parker, ma le susuga ia Felise Mikaele faatasi ma tamalii pepese mai isi atunuu.
Na maua se feiloaiga a la tatou pepa ma le susuga ia Levae ma ia faaalia ai o se tasi o fuafuaga a le Levina ua taoto nei, o le pueina ma tuufaatasia lea o talaaga ma soifua o nisi o tamalii pepese lauiloa mo le silafia ma le silamaimoa a le atunuu, ma ua fuafua e amataina i le faaiuga o le tausaga nei.
Na ia saunoa foi e toatele tamalii aemaise o alo ma fanau o loo faaauau ona fesiligia lana fesoasoani mo fautuaga ma timaiga a o folau agai atu i le taleni pese ma musika, e fiafia foi e fesoasoani mo soo se Samoa o fuafua e laasia le taleni ma le maketi o musika.
