Ua siitia maualuga le taumafai o le tamaitai o Dora Tafa i totonu o lana aoga, ma ua avea ai o se mitamitaga i ona mātua ma lona aiga, aemaise o lana kolisi faapea ma faiaoga o loo nafa ma le aoaoina o le mataupu o le Gagana Samoa i totonu o le Kolisi o Aorere.
O tausaga uma lava, e lē misi ma le faia ai o suega i le mataupu o le Gagana Samoa i aoga maualuluga o loo latou aveina le Gagana Samoa i totonu o Niu Sila nei, ma e faapitoa lava taimi e faia ai suega nei faasikolasipi i le faaiuga o le tausaga.
O aoga o loo latou aoaoina le gagana Samoa e filifili mai o latou sui e sue i le suega, ae toatele ai lava tamaiti ma aoga i Aukilani. Ua silia i le 20 tausaga talu ona fai le Gagana Samoa i totonu o aoga ae ua 5 ai nei o tausaga talu ona faagasolo lenei polokalame o suega faasikolasipi. O le tele o tausaga talu ona amata mai lenei polokalame e lē misi ai lava le faamanuiaina o alo ma tama fanau a le kolisi o Aorere i le mataupu lava lenei.
Ae o le tausaga ua mavae o se taimi muamua lea ua mafai ai ona ausia e se tamaititi aoga a Aorere le tulaga maualuga poo le sili aoao i aoga uma i totonu o Niu Sila, ma ua faamautuina ai le siitia ma le maualuga o le taumafai ma le agai i luma o le olaga aoaoina i fanau. O le suega e lima vaega na vaevaeina i ai, faitau, taliga fesili, aumai le ulutala ona tusi ai lea o ona manatu, faatasi ai ma le tautala i le autu e pei ona tuuina mai, faapea le vaega mulimuli o le faasamoa ma le faaperetania. O nei vaega uma na faamanuiaina ai Dora Tafa i ona maka e 21.
O le tamaitai o Dora Tafa ua ia ausia lea tulaga maualuga, auā na amata mai i le Year 9 lona aveina o lenei mataupu seia oo lava i luga i le vasega Year 13 i le tausaga ua mavae 2014.
O lona finafinau ma lona sogasoga ua ia mauaina ai se matatia lelei mo lona olaga aoaoina aemaise o se faamanuiaga mo ia. Ua lē toe fesiligia le isi sitepu fou o le a ia savalia aemaise ai o lona faamāmā avega i nai ona mātua ma lona aiga i le lumanai o lana taumafai.
O le masina fou ua atofaina lea e malaga atu ai i Ueligitone le susuga i le faiaoga poo le tausi ia Jennie Tapu, o ia o loo tauaveina le Gagana Samoa i totonu o le Kolisi o Aorere faapea ma le tamaitai ia Dora e tauaao lana faailoga mai le Minisita o Aoga.
O le tausaga lenei ua tapena ai Dora Tafa i lana sikolasipi i le Iunivesete i Aukilani e faaauau ai lona taumafai e ala i lana faaloia. Faaalia foi le agaga faagaeetia o le tausi ia Jennie Tapu i le taumafai o alo ma tamafanau o Samoa o loo aoaoina i totonu o le latou kolisi, ma o se ‘ai foi lea mo le aoga atoa.
