Tatou te moomoo ma talotalo i alo ma fanau a Samoa ia faamanuiaina i soo se taumafaiga lelei mo le atamai, taaloga, siva ma pesega ma soo se taleni e agavaa lelei mo le siitia pea o le igoa o Samoa i atunuu i fafo.
O le alii o Tyrone Tanielu-Ramese o le aoga o Hoxton Park High School, i Sini i Ausetalia ua faamanuiaina i se sikolasipi e $20, 000 Ausetalia mo le ulufale atu ai i le Iunivesite a Bankstown Iuniversity Campus, i Sini i le tausaga e 2018.
O Tyrone e 15 ona tausaga ma o loo sailiili atu i mataupu tau Graphic Design, Architect ma le faasaenisi.
Na maua se avanoa e feiloai atu ai le tusitala i si ona tina o Suniula Tanielu na ia faaalia e manao Tyrone ia avea ma tagata fai polokalame faatekonolosi pe a mae‘a ana taumafaiga i le iunivesete, ma o se miti lea o loo taufai talosia e ona mātua ma le aiga ia taunuu i le manuia. Sa faaalia foi e Suniula o le sikolasipi e amata i le 2018, ma o lenei tupe e faaaogā mo tusi aoga ma le pili o le aoga ma le totogi e nofo tumau ai Tyrone i totonu o le iunivesete i lona tausaga muamua. E iai foi le faamoemoe e faapea ona faaauau ai le isi lua tausaga o totoe o lana aoga i le iunivesete.
O se polokalame tāua lenei mo tamaiti aoga ua faia e le Bankstown University mo le faalototeleina o fanau e suesue malosi i mataupu uma ina ia siitia le tomai faaleaoaoga.
O tamaiti uma e maualuluga o latou maka (Excellent) mai mataupu uma e faamanuiaina i le sikolasipi. Mai le kolisi a Hoxton, na o le toatasi le alo o Samoa na faamanuiaina ai ua na o Tyrone.
O le tina o Tyrone o Suniula e mai Safotu, Saleaula i lona itu tamā ae o Lotofaga ma Leulumoega i lona tina.
Na uluai aumau i Porirua, Ueligitone i Niu Sila a o lei siitia atu i Sini i Ausetalia i le 1990 ua faamautu ai nei. Ia manuia lou taumafai Tyrone ma lou lumanai!
