O le masina o Oketopa 2015 o le a faamautu ai fuafuaga a le kamupani o le Bumble Bee ma le Malo o Samoa i le aumai o nisi o galuega a le kamupani tuuapai‘a lenei i Amerika e faagaioia i Samoa.
O galuega ia tau i le faamamāina o le i‘a o le apakoa, tuu‘aisa ma la‘u i nofoaga i Amerika o loo tuuapa ai i‘a. O se isi faaupuga faigofie o se nofoaga e safu ai le i‘a o le a faatuina i Samoa e pei ona fuafua ai le Malo e faaaogā i ai nisi o fale tetele teu oloa ua lē o toe faaaogāina o loo i luga o le uafu i autu i Matautu i Apia.
“Sa maua le matou feiloaiga ma le Bumble Bee, ma o le tāua o le feiloaiga lea na o ane ai ma i latou e iai o latou vaa (vaa fagota)”.
O le finagalo lea o le afioga i le Palemia Susuga Tuilaepa L Sailele Malielegaoi, i se feiloaiga ma sui o le kamupani, a o iai le taitai o le Malo i sauniga o le Fu‘a a le Malo o Amerika Samoa. O le kamupani lenei e pei ona faailoa e le Palemia e na o le i‘a lava o le apakoa latou te faatauina. “O le mea lena ua ou fiafia ai sa ou tau masalosalo e ono iai se faaletonu, ona o lea ua mae‘a a tatou talanoaga ae faafuasei loa ona faatau e le isi kamupani Thailand le kamupani”.
O le finagalo o Tuilaepa na ia faailoa ai ua faamautu ane e sui o le Bumble Bee ia latou feiloaiga i Tutuila le faatumau pea o fuafuaga a le kamupani.
O loo iai le faatatau o le masina o Oketopa o le tausaga nei ua faamae‘a tapenaga a le kamupani, ona mautu loa lea o le faamoemoe mo le faatuina i Samoa o se tasi o ona lala.
O loo iai le fuafuaga e amata galuega i le kamupani i se aofaiga e 300 tagata faigaluega ae o le faamoemoe e oo i le tasi le afe tagata faigaluega. “O se itu lelei lena i le fuafuaga lenei a le Malo auā o le a maua ai galuega mo nai o tatou tagata”.
O le finagalo o le alii Palemia na folasia i le mataupu lenei, na ia faailoa ai le naunau mai o lea kamupani ae ua na o le i‘a o le apakoa o le a latou faaaogāina ae lē o le atu ma le ‘asi‘asi.
“O le apakoa o lona tau i le taimi nei e tolu afe tala Amerika i le tone, ae o i‘a o le atu ma le ‘asi‘asi ua pa‘ū le tau e ono selau tala Amerika i le tone, o le mafuaga lena o le fia o mai i Samoa ona o tatou lea e tu ogatotonu i le faataaliolio o atunuu o le Pasefika e tetele o latou ogasami faatulafonoina, e mafai ona agai mai o latou vaa fagota ia tatou, ma faatau mai i le kamupani lea”.
O le naunau mai o le Bumble Bee ona o i latou ua pulea sa galulue uma i kamupani tuuapai‘a o le Vancamp ma le Starkist i Amerika Samoa, ma ua latou silafia le tulaga lelei pe a aumai se lala o le kamupani i Samoa tutoatasi.
