Ua lē masino le mau solitulafono e aafia ai le tosoteine poo le faiaiga faamalosi ua oo i ai le lima malosi o faasalaga a le faamasinoga. Peitai e eseese lava mea e tutupu i taimi e aliali ai nei ituaiga o solitulafono.
I le 44 o ona tausaga ma lana galuega o se alii ave taavale laiitiiti la‘u pasese poo se ave taxi, e fai lona toalua faaipoipo ma lana fanau e toaono, e lei faafitia e lē ua molia le moliaga a leoleo o lona faiaiga faamalosi ma se tamaitai ua 21 tausaga le matua.
O le taimi na tupu ai le solitulafono faato‘ā 20 tausaga o le tamaitai e pei ona faaalia i folasaga a leoleo.
O tolaulauga a leoleo na faaalia ai, o le Aso Lulu, 23 o Iuni o le tausaga na tea nei, 2010 na alu ai se tafaoga a le tamaitai na aafia ma nisi o ana uo teine i le fale kalapu o le On the Rocks Bar o loo i Tauese i Apia.
O le tafaoga lea na taumafa ai ni a latou ava malosi i lea fale kalapu, ma e faapea mai le folasaga a leoleo sa iai ma lē ua molia.
I se taimi mulimuli i le afiafi o le Aso Lulu lea na latou tuua ai le fale kalapu, ae agai loa i Taumeasina o se nofoaga i le nuu o Moataa i le itumalo o le Vaimauga ma faaauau ai le latou fiafia i le fale o se tasi o uo teine a le tamaitai na faamalosia ma faia i ai se faiga aiga faamalosi.
Na lagona e le tamaitai ua tele lana inu i le ava malosi ma agai ai loa i se tasi o potu o le fale o lana uo teine, ma fai ai sana malologa (moe) a o faaauau lava le inuga a isi ana uo i lea afiafi po ma o loo iai lava ma lē ua molia.
O le tele o le ava malosi na inumia e le tamaitai, sa ia lē manatua ai se mea e tasi na tupu ia te ia, e pei ona faaalia i le lipoti mo lē na aafia, le victim impact report. Na ulufale lē ua molia i le potu o loo tofa ai le tamaitai ma faatino ai loa le solitulafono.
O le saogalemu o tamaitai talavou ma isi latou te lē iloa ma masani lelei ai, o se faanoanoaga ma popolega lea o le faamasinoga ona o le mea na tupu. Faaalia e leoleo o le taeao o le aso na soso’o ai ina ua maleifua le tamaitai, na ia faato‘ā iloa ai le mea na tupu ina ua ala a‘e ua telenoa ua leai ni ona lavalava.
O le mea mautinoa e pei ona faaalia i le faaiuga a le faamasinoga, sa onanā uma i latou sa iai i le fiafia, ma o le mafuaaga lea na lē mafai ai ona saili poo fea tonu le mea o iai le tamaitai, ma iloa ai le mea na tupu. Na logoina leoleo ma faia ai loa suesuega.
Faaalia foi i taualumaga o le mataupu e matuā lē silafia e le tamaitai le alii na faia le solitulafono ia te ia, ma o se lapataiga lea a le faamasinoga i le itupa o tamaitai ina ia mataala lelei i tagata e laei i amioga faamamoe ae o totonu o luko feai.
O seevae o lē na molia na galo i le potu sa tofa ai le tamaitai, ma o se molimau na vave ona iloa ai le tagata na faia ma le mea na tupu.
O le lipoti i aafiaga o le tamaitai o loo manino le umi o se taimi o le a taia ai pea lona mafaufau i le mea na tupu, aemaise o lagona o le matamuli ma le maasiasi mai ana uo ma isi tagata o le a latou iloaina le mea na tupu ia te ia.
O le faasalaga maualuga mo le faiaiga faamalosi o le 10 tausaga i le falepuipui, ma o le tapulaa lea na amata ai le fua a le faamasinoga i se faasalaga mo lē na molia. Peitai sa iai vaega na faatāua e le faamasinoga e pei o le ioega a lē ua molia ina ua mae‘a ona faamautu moliaga a leoleo, ma o sona ‘ai lelei lea.
E tolu tausaga na toesea i le vaega lea faatasi ai ma le isi 12 masina ona o le lipoti a le ofisa faanofo vaavaaia na ta‘ua ai o lē ua molia o se tagata e amio tausaafia ma o le faato‘ā molia lea i se solitulafono. Na toesea ai foi ma le taimi sa nofo taofia ai i le vaaiga a leoleo, ma ua totoe ai ai le 6 tausaga ua nofosala ai lea alii matua i le falepuipui.
