O le sauniga mulimuli na faia i le tala ai i lalo o le Malumalu Paia o Malia Imakulata i Mulivai, na lauga ai le taitai o le Ekalesia Katoliko i Samoa, le Afioga ia Moseniolo, Alapati Mataeiliga i le tāua o le vaai i le malumalu o le a tala i lalo, ua na o se faailoga vaaia, ae o le malumalu moni o le Atua o loo i totonu o tagata Kerisano taitoatasi.
O lea lava lauga na ia toe faamanatu ai le tāua o le tino o Iesu Keriso, o le malumalu paia lea na faapea ona “faatama‘ia” ona o le faamagaloga o agasala a le tagata.
“E lē ua lava le tino o Iesu Keriso na faatama‘ia ona o oe ma a‘u? E tatau ea ona toe faatama‘ia atu ma nisi mo lea mafuaaga?”
O le lotea o Malo Aufaatasi, ona ua laga e le Afioga i le Akiepikopo o le Ekalesia Katoliko mo Samoa faapea isi atunuu o le Itulagi, ona o lona manatu e tatau ona toe faamanatu i taitai o Samoa le tāua o lona Faavae.
I le agai atu ai o Samoa i lana faigapalota na ia ta‘ua ai e tatau ona toe vaavaai toto‘a taitai o le Malo i lenei mataupu.
Ua tele taimi o laga e taitai o lotu kerisiano i Samoa le tatala pea o le avanoa e faatutū ai nisi tapuaiga i Samoa ua lē o gatusa ma le Faavae lea o loo unaia ai le Talitonuga faa-Kerisano i Samoa.
“Ua uma ona faauuina Samoa e le Atua,” o lana saunoaga lea.
Na faaaauau le folasaga a le Afioga Moseniolo Mataeiliga ma ia faapea mai ai, “Aisea ua faaluafesasi ai lo tatou atunuu ma ona taitai i le Faavae e pei ona o loo manino ai le tāua o le ola ma tu ma aga faakerisiano i Samoa?” Ta‘ua e Moseniolo o loo manino lava le Faavae, ae o isi vaega o loo ua tatala ai le avanoa i isi tapuaiga e ese mai i le talitonuga o le toatele o Samoa, lea la ua tulai mai ai faaluafesasi nei.
O loo faamauina i le Faavae o le Malo Tutoatasi o Samoa le tatala atu o le saolotoga i soo se tasi e faatino ma faamamalu ai lana lava tapuaiga.
O le taimi lenei ua iai lotu Musalemi ma isi lotu e lē o fesootai ma a‘oa‘oga faakerisiano, ia ua mafai ona faatutū i Samoa ma o loo aloaia lo latou iai i le atunuu ona o le vaega lea o le Faavae ua tatala ia i latou o loo faapea ona iai le manaoga e faatino ai lea tulaga.
Talu ai o tuutuuga nei ua amanaia i lalo o le Faalapotopotoga a Malo Aufaatasi, o le faamalosia o le saolotoga o tapuaiga, na ta‘ua e Moseniolo, ua tulai mai ai loa suiga nei. “O Malo Aufaatasi ea o se Atua lea? O lana fesili lea i faauluuluga o le malo o Samoa mai i lana Afioga Mamalu i le Ao o le Malo.
“Afai e sau se isi e faaletonu le mafaufau se‘i tulou, ma taumafai e faatū sana lava lotu, o lona uiga o loo tatala lava le avanoa i lalo o le tatou faavae e fai ai lea tulaga,” o se finagalo lea o le taitai o le Ekalesia Katoliko. “O le ā le mea e faaluafesasi ai le faaiuga fai, ae o loo manino ua faauuina Samoa e le Atua?”
O le asō lea ua amata ai ona tala i lalo le malumalu o Maria Imakulata ma e lē gata i le Ekalesia Katoliko ae o se tasi lenei o nofoaga ua fesootai ai soo se tasi ma le taulaga o Apia.
O le 1885 na fausia ai, ma o le malumalu lenei ua toe faafou ae o ona foliga vaaia nei ua tumau lava i lenei vaitaimi. O le latalata atu i lenei nofoaga, e manino ai le tulaga ma‘ale‘ale o lea maota ma o vaaiga mai i Kalaiesetete e vave ona oso mai i le mafaufau ona o le tasi lenei o nofoaga e fai o le tu tonu i le taulaga, ae o se nofoaga ua faapea foi ona moomia le toe faamalosia.
O lea la ua toe tala i lalo ma le faamatalaga a le Afioga Moseniolo, o le a toe fausia se isi malumalu sili atu.
Ua lata ina mae‘a ona tala le Fetu o le Moana lea o loo i autafa o le malumalu ma e tusa ma le tasi le miliona tala Samoa le tupe o le a faaalu i le toe fausia o lea nofoaga.
