O totonu o nuu ma afioaga i lo tatou atunuu ua masani ona tatou faalogo ai i tala feaveai solo e uiga i isi lava tagata o le nuu. A lē o ni tala o se faanunumi a se matai ma se teine o le nuu, o tala o se nofo tane poo se faiava ua fai se la faanunumi.
E masani foi ona tatou maua ai ma tala o ni faaletonu o ni tupe ua totoo ai le Peresitene ma le failautusi o se komiti poo se mafutaga a taulelea poo matai poo faletua ma tausi.
A feaveai solo tala faapea, e tasi lava le faaiuga a tagata e oo i ai ni faamatalaga, e sa‘o ma moni tusa lava pe e lei suesueina atili se faamaoniga o ia faamatalaga, e mafua mai i ni tuuaiga a se isi tagata o le nuu ona ua iai se mea ua lē fiafia ai i se isi tagata o le nuu.
E faapea le tulaga na aafia ai se tasi o matai o le nuu o Faga i Savaii le afioga Toala Tulouna Ropati, o se tasi o matai Sa‘o o le afioaga ma o se suafa faaaloalogia ma maualuga i le nuu o loo ia umia.
Sa faaulu e lea tamalii se tagi i le Faamasinoga Maualuga i Mulinuu ma finauina ai se taui ona ua faaleagaina lona tulaga o se matai maualuga atoa ai ma lona tagata, ona o ni faiga tala ua feaveai i le nuu na laumanuia ai se la feusuaiga faaulugalii na faia ma se tasi o tamaitai o le nuu.
O lea tuuaiga na faia e se taulealea, o le atalii o le tuagane o le tamaitai na laumanuia ai tala o le faanunumi ma le feusuaiga ma lē na tagi.
E toatolu i latou sa faasaga i ai le tagi o le faitala taufaaleaga, e aofia ai le taulealea o Lino Faimalo Omeka, o lona tuafafine o Naomi, ma ona mātua o Faimalo ma Leaoa Omeka. O le isi sa faasaga i ai le tagi o se matai tamaitai o le nuu o Unasa Faapupula.
O le tagata muamua sa tuuaia poo le first defendant, sa fai lana faamatalaga i le faamasinoga e faapea sa ia vaaia i le po pe tusa o le 2 i le vaveao le tamaitai o lo latou aiga, o loo faia se feusuaiga faaulugalii ma lē ua tagi. O lana molimau sa ia iloa lelei atu foliga e ui o le pogisa ona e faapea sa iai se moli eletise i luma ane o le fale sa mafai ai ona ia iloa le mea na tupu.
Peitai ina ua asia e le alii faamasino le nofoaga sa tu ai le alii o Lino ma ia iloa atu ai le mea na tupu, sa lē faaaogāina lana molimau ona e talitonu le faamasinoga e lē mafai i le pogisa ma le mea e tu ai le moli eletise ona iloa atu ni foliga tonu o tagata. Peitai o le tuuaia o lea alii e lē ua tagi ona o ia lea na faia se lafoga ina ua misa ma le tamaitai na tuuaia i le faanunumi i le aso na sosoo ai, ona o le suega o le fagamaa o le telefoni poo le battery charger.
O le vevesi lea e pei ona faaalia na lafo ai e lē ua tuuaia se faaupuga e faapea: “E lelei pe a e lē alu alu i le maota o Toala e sau ma sau ko”. O ia lafoga sa faia i le feupuaiga e na o lea taulealea ma le tamaitai sa iai, ae leai ma nisi na faalogo i ai.
O le tamaitai o Naomi sa tuuaia foi sa toe aveesea lona igoa ma le lisi o tagata na tuuaia, ona e leai ma se molimau poo ni folasaga na tuuina atu i le faamasinoa a le itu tagi na ta‘ua ai lona tagata i le mataupu.
Ua totoe ai na o mātua o Lino ma le matai tamaitai ua faasaga i ai le tagi. Faaalia e lē na lafoina faaupuga, na ia faia lea tala i le tuafafine o lona tamā ona e musu e toe ma‘itaga ae ua toatolu lana fanau e tofu lava le tamaitiiti ma lona tamā.
Na ia tautino ma ioe i le faamasinoga i lona lafoina o faaupuga ae sa ia faaalia e leai sona faamoemoe e faaleaga ai lē na tagi ona e lei iai i le taimi na fai ai le la feupuaiga ma le tuafafine o lona tamā. O le matai tamaitai o Unasa Faapupula ma mātua o Lino sa tuuaia i lo latou faasalalau atu o tala na faia e Lino i isi tagata o le nuu.
Peitai ina ua mae‘a ona tuuina atu molimau a le itu tagi ma faamatalaga a i latou sa tuuaia, na taunuu ai le faamasinoga i le faaiuga e lē faamaonia tuuaiga o le ulugalii poo mātua o Lino, ae faamaonia na o le matai tamaitai.
O molimau na tuuina atu na iloa ai o le matai tamaitai ina ua ia maua faamatalaga i le faanunumi sa molitai le mataupu faasaga i lē na tagi i le fono a le nuu. Le fono lea na faia ai ma le faaiuga e faasala i le limaselau aumatua lē na tagi. Peitai na faia foi le faaiuga a le nuu e lē o iai i Faga lē na tagi. Ina ua lē faia le sala sa faatulai ese lē na tagi ma le afioaga.
Faaalia e le faamasinoga i lana iuga tusitusia sa tatau i le matai tamaitai ona ia suesue atili tala na ia faalogo i ai mai isi tagata o le nuu pe faamaonia, ona faato‘ā faia ai lea o se faaiuga.
O se lape lea i ona tiute o se tasi o matai faiupu o le nuu. E $15,640 se vaegatupe ua faatonu e le faamasinoga e totogi e Unasa Faapupula i lē ua tagi. Ua faaopoopo i ai ma le totogi o le tuuina atu o le mataupu e le itu tagi e $1,500 e totogi foi e le matai tamaitai.
