Lua vaiaso tufa na o lisiti ae leai ni totogi o paelo nonu

O le faamatalaga a sui o le Ofisa o le Pure Pasefika i Apia e lē o iai se faaletonu i le tupe o loo totogi ai le nonu, poo le faagasologa foi o galuega a le Kamupani i Upolu ma Savaii – e ui o lea ua faalauiloa e nisi e pei o aiga i Samalaeulu ua savali i le lua vaiaso e lē o toe maua se totogi o paelo nonu ua mae‘a ona fua ma ave e loli a le kamupani.

Na asiasi i le fale o loo fuaina ai le nonu i Salelologa ma vaaia ai ua tatala ae o le toatele na fesootai mai ma faaali o le tele o aso e agai atu e lē o tatalaina lea fale tele.

O loo iai paelo nonu i totonu o le fale ma ua faagasolo galuega. Ae na vaaia nisi o le atunuu na oo atu ma fasi pepa ma na fesiligia poo ā la fasi pepa ae na o latou ta‘ua o fasi pepa nei o lisiti e avatu i le taimi e ao ai le paelo nonu ae avatu mulimuli le tupe.

E lē o le mau lea a le aufaifaatoaga nonu o Samalaeulu ia na faaseā i le vaiaso na tea nei i le fiu e faatali le tupe o a latou paelo nonu. Ua savali i le lua vaiaso talu ona avatu fasipepa nei ae e leai ma se tupe o maua.  O le tali mai a le alii o le ofisa i Salelologa ina ua fesiligia.

“Ua silafia foi, o le atunuu e faamalie gata i ia tulaga, ae o loo lelei pea le faagaioiga o galuega a le ofisa i vaiaso taitasi.” Na ia ta‘ua foi, o loo toatele lava tagata o loo faia lea atina‘e ma o loo gasolo atu pea e fua paelo nonu e maua.

E silia ma le miliona kalone tutumu o nonu o loo i totonu o le lala i Salelologa ma e lē o iai se tulaga o atagia mai ai le faaletonu o le auaunaga a le ofisa, o le faaopoopo lea a lea sui.

O loo iai foi le seleni o loo faagasolo ai galuega a le ofisa ma o loo totogi foi le seleni ia i latou e oo atu e fua a latou paelo nonu e ui o lea ua lē totogi sa‘o pe a mae‘a ona fua le nonu ae ua faatali ma risiti nei.

E tolu aso o le vaiaso e oo atu ai i Salafai le loli a le Kamupani o le Pure Pasefika ma  aumai ai kalone nonu o loo fua i Savaii mo le ofisa tutotonu i Upolu. E lua lala o le Pure Pasefika i Salafai, o Salelologa ma Asau ma o loo faaaogā uma ia lala e le mamalu o le atunuu e latalata ane i ai.

Peitai o le vaiaso na tea nei na faalauiloa ai le faaseā a nisi o afioaga ia e aofia ai Samalaeulu lea e ao faatasi le latou nonu ma le afioaga o Saleaula ona ua lua vaiaso o faatali ma lisiti ae lē toe totogia le latou nonu.

O le tala a le Ofisa i Apia se‘i fesiligia le au fua nonu a le latou kamupani pe moni faitioga ae aisea foi ua lē totogia ai nonu a tagata ua mae‘a ona fuaina ma faatau atu.

E $9 tala le tau o le paelo nonu e tasi ma o loo matauina lava le atina‘e pea e le toatele o loo i le motu i Salafai o le nonu e fesoasoani ai foi i le tulaga tau tupe i totonu o aiga.

O le tuutuuga ina ua faato‘ā faatau le nonu, e totogi sa‘o lava le aufaifaatoaga i le taimi e fua ai le nonu ae o lea la ua foliga mai ua sui le faiga, ua va i ni nai aso ona faato‘ā totogi lea.

E iai foi isi kamupani o loo aoina mai le nonu i Savaii ae e pei o le Pure Pasefika lea ua toatele ua agai i ai ma a latou paelo nonu.