Matautia faiga a le faleaiga “Tiresa Taste of the Pacific” i Kalaiesetete

O se auaunaga fou lenei i le itu tau gaosia lelei o taumafa eseese faa-Pasefika i totonu o Kalaiesetete, lea faatoa lima vaiaso talu ona tatala aloaia ina ua manaomia tele lea ituaiga pisinisi i totonu o lenei aai aua ua feololo lava le faatupulaia o tagata Samoa o loo aumai ai.
O lenei faamoemoe sa tatalaina aloaia e le susuga i le faifeau, Pastor Afoa Noa ma le faletua o Seepa mai le ekalesia Faith and Life Changing Ministry, ma o le aulotu foi lea o loo tapuai ai le susuga i le pule o le faleaiga.
O le faleaiga ua faaigoaina o le Tiresa Taste of the Pacific, e pulea e le susuga Apoua Mataafa ma le faletua o Agnes mai le afioaga o Leulumoega ma Salamumu, ae o lo la alo tamaitai o Tiresa, tolu tausaga lea o loo igoa ai le pisinisi tau amata.
Na taua e Apoua i le tusitala na ala ona ae se tofa ona sa amata i lona kukaina o ni masi ma keke saina ma faatau atu i faalapotopotoga ma fale faigaluega faapea aulotu, ae talu ai ona o le manaomia tele aua e le pei o Aukilani e tele ai le taumafa faapea, o le ala lea sa toe liuliu ai loa le tofa ma mananao ai loa e faatu se la pisinisi faleaiga.
O se fuafuaga sa le faigofie le faafaileleina ae na taumafai pea ma oo ai ina tini le faamoemoe i totonu o Kalaiesetete.
Sa ia taua foi o lona aiga ua iai nisi o auaunaga faapenei i totonu o Aukilani faapea Saleimoa, e le fou foi la ia te ia le vave ona ala po ma toe tuai ona moe, e leai foi se manuia e maua ma se fifilemu.
Ua toatele le mamalu o le atunuu ua agai atu i ai i le faleaiga nei talu ai le manaia gaosia lelei o soo se taumafa, manogi i le tausami (good quality) aemaise o le mama ma le matagofie o le fale mo le itu tau soifua maloloina.
Nisi o taumafa ua aofia ai ituaiga kuka Samoa eseese aemaise faausi e aoga tele mo nai matua matutua, ua agai atu foi le auaunaga mo le saunia o taumafa mo maliu ma faaipoipoga aemaise aso fanau.
E manaia tele le tulaga o loo iai le faleaiga nei e afe gofie ona o loo i le taulaga faatau o Woolston, 711 C Ferry Rd e tulata tele i aulotu EFKS ma le Metotisi ae maise le paka malae taalo lauiloa AMI stadium.
Na fesiligia e le tusitala poo ai e kukaina faapitoa mea taumafa ona o le manaia i le tausami ae na saunoa Apoua Mataafa, o ia lava lena faatasi ma le fesoasoani a nisi e toalua o le aufaigaluega, o le molimau foi lea a le sui o le nusipepa ona e fai o le laufofoga fiafia ma le tamalii o le alii pule ma lona faletua, ae sili ai ona felesi matagofie mai taumafa eseese ua saunia mo le mamalu o le atunuu.
Ae talosia ia le auaunaga ua amatalia i totonu foi o Kalaiesetete, ia tupu ma ola e fai foi ma faamama avega mo i latou e feagai ma faalavelave tau aiga.