40 tausaga le tautua a Leautuliilagi i le Fletcher Pacific Steel

E le toatele nisi o tamafanau Samoa ua ausia sea ituaiga matatia faapea i le soifua galue aemaise lava i nisi o kamupani tetele faapea i lenei atunuu o Niu Sila, faatasi ai ma le matua o le soifua ua oo iai i le taimi nei.
O le afioga Leautuliilagi Lui Otineru sa malaga mai i Niu Sila nei i le 1970 ma amata faigaluega ai mo le sailia foi o se fesoasoani mo le aiga aemaise o se lumanai manuia. Pei lava foi o le toatele o isi Samoa na malaga mai i lea vaitaimi, sa tele galuega e galue ai a o talavou foi le soifua i lea vaitau.
O le lona lima o ana galuega talu ona taunuu mai i Niu Sila nei na avea ai o ia ma afe lifi i le kamupani a le Fletcher, ma o i tonu na amata tau mai ai le 40 tausaga lea ua ausia e lenei tama o galue ai ma le faamaoni i lea foi kamupani.
Sa faaalia e Leautuliilagi e lei faigofie foi na aso i le taunuu mai i Niu Sila nei ma taumafai e faamautu ai le olaga, peitai o le faamalosi lava ma le naunau ia maua se manuia lelei mo le aiga ma lona foi tagata na ala ai ona faaauau pea le tautua ma le ofoina o le soifua e galue ai mo le Fletcher.
Alu ai alu ai lea galuega, ua tele foi ma le tomai ma le silafia ua ia maua i le faaopoopo pea o tausaga o galue ai ma mataituina le faatinoina o galuega, solosolo foi agai i isi tulaga maualuluga atu le galue latou aemaise lava i le tulaga tau i le faafoeina o masini.
O le taimi nei ua 66 tausaga o le tama ma o ia le sui o le kamupani lea a le Fletcher e na te assess pe iloilo foi le agavaa o soo se tasi e avatu e le kamupani e fia aveina masini tetele pei o le crane e matele lava ina faaaoga e fai ai a latou galuega. E pei ona faailoa atu muamua e le o se galuega faigofie lenei matafaioi aemaise o le vaega o le uamea o loo patino tonu i ai le latou auaunaga. I nisi foi o ata na vaaia e le Samoa Times i le faatinoina o tiute o lea tama, e faamaonia ai e le faigofie le galuega o feagai ma ia aemaise lava i fale maualuluga i le atunuu e tatau ona faaoo i ai le uamea i le pito i luga o galuega taitasi e faia, ae o le masini lea poo le crane e faatinoina uma. O le afioga Leautuliilagi e mai le afioaga o Vailoa i Palauli ma Salelologa i le motu tele i Salafai ma o le ausia ai o lea matatia i lona soifua o se faamanuiaga mo ia ma lona aiga aemaise foi i le kamupani.
O le 40 tausaga o le auaunaga o se taimi umi ma ua iai foi faamanuiaga tau le galuega e maua e lenei tama i lona faamaoni ma le sogasoga i le galuega.
Ua fuafua le kamupani e faailogaina ma faamanatu le 40 tausaga o le auaunaga a lea foi tamalii o le atunuu, pe a toe taliu ane i le galuega i le Aso Lua o le vaiaso fou.
O faiga masani lava a lea kamupami, o le fesiligia lea o sē o le a faamanatuina lea taimi umi, poo le a se mea e manao e fai e le kamupani mo lea aso. Ina ua fesiligia le afioga ia Leautulilagi, ae sa tali le afioga, e manao e tunu vilivili se tamai puaa sei tulou, ua taoto ai nei la i paga le manaoga o le tama, ma tali ai le toe foi i le galuega i le Aso Lua o le vaiaso nei, sei tausami i le susua ma le manogi o lea foi manaoga.
O le afioga ia Leautuliilagi sa amata galue mai i lea kamupani a o lei suia le igoa ina ua faatauina e le Fletcher.
O le Pacific Steel sa igoa muamua ai, peitai ua suia nei ma ua faaigoaina i le Fletcher ona ua faatauina e lea foi kamupani tele.
O le isi tulaga sa maitauina e tusa ai ma se molimau a lea foi tamalii o le atunuu, o lona faamaumauina lea o suafa ma le aofai o i latou ua maliliu, sa latou galulue faatasi, talu mai lava le uluai taimi e pei ona taua.
E pei foi ona silafia, tasi lea o kamupani aupito i toatele tagata maliliu i le taimi o galuega, e pei foi o ni vaitaimi e lei mamao atu, lea sa maliliu ai tagata e toalua i le taimi e tasi, ma nisi i le taimi muamua atu.
O le taimi nei o loo alo i lana malologa mo le masina atoa lenei o Ianuari ae amata ana galuega i le masina fou o Fepuari o le a toe vaaia ai foi Leautuliilagi i lona nofoa masani e faafoe ai le masini e pei ona taua o le crane. O loo aumau nei lea tama ma lona faletua i Papatoetoe ae e toalua nai o la alo o tama uma. O Leautuliilagi sa ia faailoa lona agaga faafetai i le Atua i le faamanuiaga, aemaise foi i se tasi o ana taleni o le fofo e pei ona manuia ai nisi o gasegase.