O le sui o le Toa Samoa i le ipu o le lalolagi 2008 ia Ben Teo na suia atoa le taaloga semifinals i le va o Lana au o South Sydney Rabbitohs ma le Manly Sea Eagles. I le minute fasefulufā a o tutusa ‘ai e ta‘i sefululua na tulai mai ai loa Ben Te‘o lea na momo‘e malosi atu ai ma sikoa e ui ina fiu Manly e vaovao ma sili ai loa ‘ai e 18-12.
Na vaaia le alalaga fiafia o Souths faapea le latou tapuaiga ma amata see atu ai loa Le Rapiti i ‘ai faaiu 32-22 ma sao atu ai e saili le siamupini o le 2014 ma le Bulldogs.
O le isi foi alo o le atunuu ia Tim Lafai na mataina tele lana taalo mo le Bulldogs e lē gata i le osofai, puipui faapea le kiki polo. E uma le taaloga o finau atu lava le Panthers a o sili Canterbury 18-12. O le taimi lea na vaaia ai le mataalia o le puipui a le Taifau.
Ua sauni atu nei ‘au a le Dogs ma le Bunnies lea na gata le ausia o le finals i le 43 tausaga.
