O le faaiuga o le vaiaso na faagasolo ai taaloga a aufili i lalo 15 ma le 17 tausaga i le va o Melepone faapea Sini, na faia i le malae a le aoga maualuga a St. Gregory’s i Campbelltown. O lenei polokalame fou a le Iuni Lakapi a Ausetalia ua avea ma avanoa e faailoa ai le taleni a le toatele o alo ma fanau a Samoa ua masii atu i Melepone mai Niu Sila ma isi setete o Ausetalia.
I le aufili i lalo o le 15 tausaga a le Melbourne Rebels na taalo ma le NSW Tigers e to‘a sefulutasi alo o Samoa na malaga mai ai e lē gata o le manumalo ae o le faaaogāina o le polo ma le mānava (fitness). O se tasi o lenei sefulutasi o le alii lea o Alex Saaga le alo o Rika ma Sefulu Saaga. O le alii o Alex o le uso laiitiiti o Fred Saaga lea e pou foi i le aufili a tama aoga a Ausetalia. O nisi o sui iloga o lenei ‘au e aofia ai le sauai ia Trevor Hosea na o le sefulufa tausaga ae 6futu lima inisi le maualuga. O le isi alii Samoa mataina le taalo o Phinex Hunt i le tulaga o le ‘afa.
Saunoa Rika Saaga le tamā o Fred ma Alex, o Melepone i le taimi lenei o se avanoa lelei mo i latou mai Niu Sila poo se isi setete e saili avanoa ai fanau mo aufili laiti nei ma alu atu ai i le Supa 15 auā e lē pei o le faigata e iai Sini ma Kuiniselani. I le aufili a Melepone i lalo o le 16 na malaga faatasi mai ai foi mātua o isi fanau e toasefulutasi ma manumalo ia Niu Sa Uelese. O le pou o le ‘au a Melepone o le alii lea ia JP le tei (nephew) o le sui muamua o le Manu Samoa ia Matamua Filipo Saena.
E taufai malolosi uma taaalo a alo talavou o Samoa ma ia latou sikoa uma na vaaia ai le faatusalia i taaalo a au sinia e lē gata i laina na tamomoe ai le fanau ae o le faaaogāina o le polo. Saunoa Matamua Filipo Saena, o le taleni o iai alo o Samoa ua malaga atu ma nonofo i Melepone e telē se lumanai o iai pe a tinou lava le fanau agai atu i le lumanai. E faapena foi i alo uma na malaga faatasi mai ma o latou mātua. O le lumanai e toatele loa alo o Samoa i aufili nei e pei o Melepone, faigata loa ona toe faafetauia.
O le isi alo laitiiti o Matamua ia Lui Saena (U11) ua amata silafia lona agavaaa ma o se tasi e ono sosooina le taleni a le tamā ma o se miti lea e fai ma meaalofa i le tina o le aiga na maliu i le masina talu ai.
v
