O le aotelega lea o lauga a le alii Palemia i sauniga i le faaiuga o le vaiaso e tatala aloaia ai auala galue ua mae‘a ona fausia i le afioaga o Lotofaga ma Aufaga i Aleipata. O nei lafoga ua faia e le taitai o le Malo, ona o le tele o tuua‘iga ua fai ai le piopio o le malo a le HRPP o iai nei. O tuua‘iga ua lafo e le Itu Agai ona o le tele o mataupu na faapea ona laga ma iu ai i le folafola e nisi o sui o le HRPP le o ese ma taufaatu se vaega faaupufai.
Ua faapea foi ona tali le Palemia ma faapea mai o ni lafoga faatalasua ae o lea lava ua agai tusitala ua fai i ai a latou ripoti. E ese foi finauga a tusitala latou ae o le tatalaga la o galuega tetele nei e lua na maua ai loa ma le avanoa o le alii Palemia e tali mai ai i lipoti o tuua‘iga e pei ona ta‘ua. Faaalia e le alii Palemia, ua fesiligia soo le corrupt. “O le ā le uiga o le corrupt, o le agasala, o le piopio,” o lana faamatalaga lea. “Oi e fai atu galuega e atinae ai le atunuu ae fai mai e corrupt!”
O le isi faitioga ua lafo o le tele o galuega a nuu ia e tatala o latou auala e toe tau saili ai palapala o malo ma tupe e faatino ai faaaloalo e ave i le malo pe a masii atu i sauniga e tatala ai nei galuega. O le tali a le alii Palemia. “E fiu lava e taofi atu ae agai lava nuu e fai faaaloalo ona e faigata lava le faa-Samoa ma o le ta‘u o le gaioiga lea o le faaaloalo ae lē o le corrupt”.
O le galuega a le afioaga o Lotofaga, e $810,000 tala Samoa le tau atoa ma na faatautaia e le konekarate fai auala a le King Construction. E 2000 mita le umi o lea auala ua mae‘a nei ona faata atoa. O le isi galuega o le auala lea o le afioaga o Aufaga lea e 2250 mita le umi ma e na faatautaia le galuega tele lea e le Ott Transport o se isi foi konekarate faiauala i totonu o le atunuu. E tasi le miliona tala le tau atoa o le galuega lenei.
O le sauniga la lea, na auai atu ai foi ma le taitai o le Itu Agai atoa ai nisi o le Palemene ma le Kapeneta atoa ai faauluuluga o matagaluega a le Malo, na vaaia ai foi faaaloaloga masani e pei ona finauina nei o faiga piopio. Faaalia e le alii Palemia e talafeagai le tatala o nei galuega ma ave le faafetai i le Atua na mafai ai ona tino mai ia taumafaiga, ma e lē o se sailiga manuia o taitai o le malo e mafua ai ona faatino ma o loo manino lava foi le faatinoga o galuega i le faatino ai o sauniga aloaia e tatala ai.
