E lē fua tasi i se tulimanu o le lalolagi lenei vaitau o le faaiuga o le tausaga ma faauuga o alo ma fanau ua mae‘a i le manuia a latou taumafaiga faaleaoaoga.
Na faatumulia le Town Hall i le Aso Tofi na tea nei i le faauuga o i latou na aotauina i le iunivesete o Vitoria. Ae o le po o le Aso Faraile na tea nei na toe tumutumu ai mātua ma malo faaaloalogia i le toe faia ai o le faauuga mo tagata Pasefika lava latou i le Iunivesete o Vitoria.
Matagofie le faafeiloaiga faa-Maori e le pule o le Iunivesete le Polofesa o Piri Sciascia ona amata ai lea o le sauniga i le tatalo na saunia e le afioga a Patele Penehe ma faasolo ai loa le polokalame.
O le tele lava o tama ma teine aoga sa faauu o i latou sa suesue atu i mataupu tau loia, faiaoga, fomai, mataupu tau tupe (commercial/accounting) faasaienisi, faapea itu tau faafiafia (performing arts).
Na vaaia le loifofoga maligi i nisi o i latou na faauu ona o le lagona fiafia ua iu le taumafai ma maua le faailoga. O nisi foi o i latou na tutulu ona ua vave manatua nai mātua ua fai i lagi le folauga, ma ua lē aulia ma maimoa i le iuga o a latou tausinioga.
E 67 i latou mai le Pasefika na maua faailoga o le atamai. E 3 o fomai (PhD), 11 na latou maua le faailoga o le Master, e 49 i latou na maua Bachelors ae 3 na maua le Postgraduate Diploma i le Art ma le faiaoga, ma le toatasi na maua le Postgraduate Certificate i le faafomai.
O le tamaitai o Annie Leitupo na faamanuiaina i le faailoga o le Bachelor of Commerce ae faapitoa i le Commercial Law ma le Accounting.
O Annie o le alo o le fetalaiga ia Uta‘i Ve‘a Leitupo mai Siumu ma le tausi ia Fipe Tanielu-Leitupo mai Auala, Vaiala, Safotu ma Saleaula. Na faimalaga mai lava i Samoa nei mātua mo le faauuga o si o la alo.
Na faapea foi ona faauu ai le alii o Perry Eliuta Laumalili i le faailoga o le Bachelor of Commerce e faapitoa i le Commercial Law ma le Management with a minor i le International Business.
O le alii o Perry o le alo o Leituala Pitone Laumalili mai Vaimoso ma le faletua ia Faamata mai le afioaga o Iva ma Solosolo.
O le alo o le susuga i le Faafeagaiga o Tautiaga Mamea ma le faletua o le EFKS i Newtown, le tamaitai o Tinei Mamea na faauu ai foi i le faailoga o le B.A. i le Criminology ma le Samoan Studies e faapitoa i le Pacific Studies.
Na faapea foi ona faauu ai le tamaitai o Tupe Lualua i le Postgraduate Diploma of Arts e faapitoa i le Pacific Studies. O Tupe o le alo o le fetalaiga ia Falemua Tolua Lualua mai Savaia Lefaga ma le tausi ia Sia (maliu) mai Luatuanuu.
O Tupe o le faiaoga lea o mea taufaafiafia (Performing Arts) i le Politekinika o Whitireia, lea na faatonutonuina le tala i le Fatu na Totō. O lana vaega foi sa faafiafia ai i le po o le Aso Faraile na tea nei i le faamanatuga o le faauuga a tamaiti Pasefika o le iunivesete lava o Vitoria.
Na malaga mai foi mai Samoa le susuga i le Pule o Femalagaa‘iga ia Aualiitia Fouina Milford ma le faletua i le faauuga o si o la alo ia Tuitapuono Milford na maua le faailoga o le Bachelor of Law na faapitoa lava i le itu tau tulafono (Law) lana taumafaiga.
O le afioga i le Minisita o Tagata o Atumotu ia Peseta Sam Lotu-Iiga na foaia meaalofa mo alo faamanuiaina faapea le afioga i le Pule Lagolago Pasefika i le iunivesete o Vitoria le afioga ia Luamanuvao Winnie Laban na lagolago i ai e faaula le aufaauu.
E faamalie atu ona e faatulaga upu o le lomiga o le ala lea ua na o se vaega toaitiiti ua maua mai o latou faamatalaga lea ua lomia atu. Ae toatele lava le aufaauu Pasefika i alo o Samoa. Ia manuia tele le aufaauu ma ia maua ni galuega lelei mo le lumanai.
