Na taualugaina galuega faaleautalavou a le Ekalesia Faapotopotoga a Iesu i Samoa ma Atunuu i Fafo i Newton i Aukilani, i le po o le Aso Sa na se‘i mavae atu.
O se tasi lenei o Autalavou talitonuina o loo iai le meaalofa faauuina a le Atua e ala i Pesega ma Musika, faamaonia lea mau i le tusipese faanotaina ma faaupuina ua tuufaatasia ma o loo faaopoopoina pea isi fati fou i lea tusipese mai lea taimi i lea tausaga ma tausaga uma, ma o loo molimauina le fiafia tele i ai o le tupulaga talavou.
Na matagofie polokalame o pesepesega o le Kerisimasi Faaevagelia ma tala faatino o loo momoli ai le feau i le fanau mai o le Mesia, le “Tupu o Tupu”, “o Alii o Alii” , ma e lē fou lea polokalame i lenei tausaga, ae o se polokalame o loo faaauauina ma faia pea i tausaga taitasi.
E toatele nisi sa molimauina lea faamoemoe i pesepesega faapea foi le avanoa na laugaina ai le feau taumolimoli o le Kerisimasi e le Faafeagaiga ia Rev Rolani Mika, sa tautalagia i lea afiafi le Malo o le Atua.
Ina ua mae‘a polokalame ona faaauauina lea o talatalanoaga, faasoa‘iga, e ala i se taumafataga māmā sa saunia mo lea afiafi.
Na ta‘ape lea afiafi ma le agaga fiafia i le tele o faalumaga faaleagaga i lea po, molimoli atu ai ma faamanuiaga o le Kerisimasi ma le Tausaga Fou mai le Autalavou EFIS i Newton mo le Atunuu atoa, faapea foi faamanuiaga o le Kerisimasi ma le Tausaga Fou mai le faafeagaiga ia Rev Rolani Mika ma le faletua ia Lemafo‘e. Manuia tele lava le Kerisimasi ma le Tausaga Fou manuia!
