E atili foi ona lagona le faagaeetia e fia galue pea ma faatino ma le faamaoni le tautua lotu, pe a iloa o loo amanaia e i latou o i pulega ma taitaiga a soo se faalapotopotoga, o ekalesia ma aulotu taitasi, sao o tagata uma, e ala i le iai o ni tuufaatasiga mo ni nai faafiafiaga poo taaloga foi.
E iai la le polokalame a le Falefitu o aulotu a le ekalesia Samoa Unity Christian Church, ua latou faatulaga ina ia faagasolo faaletausaga. O se polokalame e 2 masina na faagasolo ai, e aofia ai nisi o taaloga eseese e pei o le soka, volipolo, lakapi-pa‘i, ma le kirikiti.
I se faamatalaga a le susuga Sasa Esekielu na tuuina maia lenei lipoti, na ia ta‘ua ai, o le aso 16 o Oketopa i le tausaga talu ai 2010 na amata ai nei taamilosaga o taaloga a le falefitu o le latou matagaluega, ma faaiu i le Aso Toonai lona lua, aso 13 o Novema.
O le auga tonu o nei polokalame a le ekalesia e pei ona saunoa Sasa, ina ia maua le fesootaiga māfana ma le fealofaniga a sui taitasi o le ekalesia.
O le ala foi lea e patino ai lava le polokalame o taaloga i na o sui poo tagata o aulotu o loo aofia i le latou matagaluega, ina ia mautinoa ua maua uma avanoa o sui taitasi e auai i nei taaloga. O le isi itu tāua, e lē faatapulaaina se matua poo tausaga o i latou sa taaalo, ae sa faasafua i tagata lotu uma.
E ui la ua leva ona uma le laugatogi ma tufaga faailoga o nei taaloga e pei ona alo i ai le ekalesia, ae o le Aso Toonai talu ai, aso 8 Ianuari 2011, lea faato‘ā sami pe faamanatu aloaia ai ipu na mauaina e le vaega a Mt Roskill & New Lynn mai a latou taaloga. Saunoa le susuga Sasa Esekielu, o ia o se tasi o ē na faamaopoopoina lenei faamoemoe faatasi ai ma isi sui taitasi o ekalesia uma na auai, ua mafua ona tuu mai i le vaiaso na mavae atu, ona sa tele ina tuatuagia nisi o le fanau i nisi foi taaloga o loo auai atu i ai, ae o lea faato‘ā maua lelei le avanoa e fetaui mo tagata uma.
Ua toe nofosauni foi la ‘au uma mo le isi a latou polokalame faapea i lenei foi tausaga fou.
IUGA O TAALOGA
SAMOA UNITY CHRISTIAN CHURCH
Siamupini i le vaega o Alii:
Volleyball – Otara
Touch Rugby – Mt Roskill & New Lynn
Soccer 11’s side – Mt Roskill & New Lynn
Soccer 7’s side – Otahuhu & Manurewa
Siamupini i le vaega o Tamaitai:
Volleyball – Otara
Touch Rugby – Otara
Soccer 11 side – Otara
Soccer 7 side – Mt Roskill & New Lynn
Mixed Cricket (13 alii 7 tamaitai) –
Mt Roskill & New Lynn
‘Au o le Tausaga – Henderson
Vaega Sili ona Maopoopo Tapenaga – Otara
Togiga Sili ona Matagofie – Otahuhu & Papakura
