Taofia e le alii laufali le fusuaga i le taamilosaga fa ma tuuina atu le manumalo ia Leti Emelio Leti o Samoa, ina ua lē mafai ona faaauauina e le alii o Carlos Marques mai Texas le fusuaga.
O le fusuaga a Leti ma Marques na tatala ai paga o le fusuaga tele ‘Rocky Mountain Rumble’ i le Aso Toonai ua tuanai i Colorado.
O le manumalo ai o Leti i lana fusuaga muamua i totonu o Amerika o se faafiafiaga tele lea i lana pulega faapea le tapuaiga a Samoa ma ona aiga. O Leti ua lua ana fusuaga faapolofesa sa faia i Niu Sila, lea na manumalo uma ai i le tu‘i oti, a o lei nofo ma koleni ai nei i Las Vegas.
Faaalia e Teleiai Edwin Puni o le pulega a le Event Polynesia mai Colorado, “E maualuga le laasaga lea ua oo i ai Leti, ma o se avanoa e lē aumaua auā o le fola tele lenei o fusuaga a le lalolagi. O se tasi lenei o pine o tapenaga a le kamupani a le Event Polynesia mo avanoa e lē gata i fusuaga o loo faasolo i Samoa ma Niu Sila, ae faapea i Amerika mo alo ma fanau a Samoa.”
O le alii faiaoga o Kenny Adams, o ia lea o loo tolegia Leti, ma sa avea ma faiaoga o le aufusu a Amerika i le Olimipeka o le 1988 lea na iai Roy Jones, Riddick Bowe, Ray Mercer, Kennedy McKinney ma Michael Carbajal. O ia alii fusu sa avea uma ma siamupini o le lalolagi ina ua fusu faapolofesa.
O Leti e mai afioaga o Faleapuna, Lalomauga, Salimu i Fagaloa ma Lano i Faasaleleaga, ma o loo fusu i le aupaga o le Welterweight.
Faaalia e Teleiai: “O se tasi o faafitauli tele e faaletonu ai konekarate ma lapelapea ai taaloga a alo ma fanau a Samoa, o le aafia lea o aiga i galuega a le pulega.”
O se tulaga o loo faafetaia ai e le pulega a le Event Polynesia le tamā o Leti, ia Fainuulua Emelio ma le tausi ia Itagia Leti. O le tofa ia Fainuulua poo Emelio Leti e pei ona lausilafia ai, o se tasi o fetu pupula a Samoa i lona taimi i fusuaga amateur faapea foi i le tulaga faapolofesa sa avea ai ma siamupini i le tele o tausaga i le aupaga o le Heavyweight.
O le ono ai lenei o masina talu ona nofo ma koleni Leti i Amerika, a o lea faato‘ā fusu. O Leti e lima tausaga o lana konekarate ma lana pulega i Amerika lea e iai ma le Event Polynesia.
O Leti sa uluai avea ma siamupini o Samoa i tulaga amateur i le aupaga o le Bantamweight i le 2003 ma le 2004, sosoo ai ma le siamupini o le aupaga Featherweight i le 2006. O le 2007 na avea ai ma siamupini o le Light Welterweight, ma pine auro ai mo Samoa i taaloga a le Oceania i le tausaga lava lea.
O le 2007 sa malaga ma taalo ai Leti i Niu Sila ma avea ai ma siamupini o Niu Sila i tulaga tau amateur i le aupaga o le Welterweight seia oo i le 2009 a o lei sainia lana konekarate e fusu ai faapolofesa.
Sa iai le faamoemoe o Niu Sila i le avea o Leti ma ave fu‘a a Niu Sila i taaloga a le Commonwealth i Initia. Peitai, ua ave le faamuamua a Leti i le avanoa mai Amerika e taaalo ai faapolofesa.
Faafetaia foi e Teleiai asosi fusu a Samoa, le South Pacific Boxing Incorporated ma le Samoa Amateur Boxing Association i galuega faapaaga ma le Event Polynesia o loo atina‘eina ai alo o Samoa mo avanoa e taaalo ai i atunuu i fafo.
O le kamupani tumaoti a le Event Polynesia, e lē gata i fusuaga o loo faafoeina i Samoa ma Niu Sila, ae o loo avea foi ma pulega a alii fusu faapolofesa ia Vaitele Soi, Warren Fuiava, Pele Faumui ma Oli Filimaua.
O loo i Amerika i le taimi nei le fetalaiga a Teleiai ma Rosa o le pulega a le Event Polynesia mo le tapuaia o le fusuaga muamua a Leti, aemaise le faatalanoaina o ni avanoa mo nisi alo o Samoa.
