Na avea le faaipoipoga a le tamaitai o Victoria Leaupepe ma lana manamea o Misikopa Tiatia ma se fiafia mataina e le gata mo i laua, aemaise nai o la mātua ma aiga, uo ma ē masani.
O le Kalapu i Bonnyrigg i Sini na matuā faatumulia i le silia ma le limaselau sui a valaaulia mai Faafeagaiga ma o latou faletua ma le mamalu o aiga na lua.
O le tamaitai o Victoria o le alo o le Afioga Leaupepe Matautu ma le faletua ia Tuala Victoria Leaupepe. O le susuga ia Misikopa Tiatia o le atalii matua o le Afioga Fata Lolotoa Tiatia ma le faletua ia Tusipepa Tiatia. O le alii uo sili o Phillip Cunningham a o le tamaitai o Perise Sabitri Pesamino le tamaitai uo sili aumeamamae.
Na mae‘a le sauniga paia o le sakalameta o le faaipoipoga na faia lea i le malumalu Katoliko i Liverpool ma faagasolo ai loa le laina taavale tele mo le taumafataga. O le taimi lea ua tau lē ofi le Bonnyrigg Sports Hall i le valaaulia.
O le fetalaiga Vaifale Tuala na avea ma fofoga o le tausamaaga, ma na amata ai foi faafiafiaga eseese a le aiag o Victoria ma aiga o Misikopa.
Na o le pati ma le silamio le aofia i le mālie o faafiafiaga eseese ma le mamafa o le taumafataga. Na tau fai saunoa faafetai Tuaa o Misikopa ma Victoria i ni tala toe sa tepa ai foi i tua i le soifua mai o le fanau i aga mālie ma le tausaafia o la ua uiga taitasi i totonu o la aiga taitasi.
Na saunoa foi le susuga i le alii faaipoipo e faafetaia le agalelei o la mātua ma aiga i le tausiga alofa ua aulia mai ai lenei laasaga fiafia o le olaga.
O le tamaitai ia Perise Sabitri Pesamino na saunoa foi e faamatala le la uo māfana ma le tamaitai o Victoria a o laiti mai aoga ma taaloga netipolo na taaalo faatasi ai.
Na tipi le keke ma faaopoopo i ai ma isi faafiafiaga e tele na fiafia tele i ai uo papalagi a le ulugalii fou. O Victoria e galue o se sooupu mo fefaatauaiga a le kamupani tele a le Electrolux faapea foi Misikopa i lana galuega o loo tautua ai i o la aiga ma Ekalesia.
O Misikopa o se alii DJ iloga foi i faafiafiaga i Sini nei, ma e lausilafia i le igoa o DJ SKOPA lea e fai ma galue i le Poly Club i taimi avanoa.
