Ua atoa nei le vaiaso talu ona tatala le ofisa o le Toomaga mo e Puapuagatia i Sini nei, ma ua vaaia le amata o galuega a le Ofisa e fesoasoani.
Na faaalia e le tamaitai Pule ia Cecilia Theodor le moomia ona faapupula atu i tina, tamaitai ma tagata lautele le ogaoga o mafatiaga e tupuga mai i le soona sauaina o lea itupa i totonu o aiga ma mafutaga.
E oo lava foi i le fanauiti, ua tatala nei polokalame e faapupula atu ai le tineia o le pa‘ilima o mātua i fanau faapea i le va o ulugalii.
Na saunoa le Afioga Tuisugaletaua Aveau Sofara i le tatalaina o SVSG i Sini nei, i le tele o suiga e oo i ai olaga o fanau ma taitoalua pe a saoloto mai nei sauaga, e ono tatala ai lagona e finau mo mea lelei.
O aoaoga i potu aoga nisi o vaaiga lelei e tulai mai i va ma isi tamaiti, ae le gata i lea o le faatupulaia o le toafilemu.
O le Afioga i le Alii Palemia na saunoa foi i Sini i lea lava faamoemoe i le talosaga a le tamaitai Palemia o Ausetalia ia Julia Gillard, i le moomia o lenei tautua poo se laasaga mo atumotu o le Pasefika.
O lea manatu o Julia Gillard na faaalia i le fonotaga a atumotu o le Pasefika na faia i Rarotonga i le amataga o le tausaga nei. Sa faalauiloa ai i lea sāvali le maualuga o le fuainumera o lea soligatulafono i tagata Pasefika o loo aumau i Ausetalia.
O le tatalaina la o lala i Sini ma Perisipeni o le Toomaga poo le Samoa Victims Support Group, o se tali atu lea i se taumafaiga e faalalo ma foia lenei pagatia.
O se faamaumauga a le Ofisa o le Loia Sili a Ausetalia ua faailoa mai ai foi le maualuga o le numera o fanau a le Pasefika ua i totonu nei o nofoaga taofia poo juvenile detention, ona o aafiaga o aiga ua tetea mātua, ae saoloto ai fanau ma aafia ai i taa‘iga ma solitulafono, ae peitai o loo i lalo o le tausaga faatapulaa mo tagata lautele (juvenile).
