Sauniga faafetai o le malumalu tuai ma le faamoemoe i le fausiaina o le malumalu fou:
O lenei sauniga, o le toe sauniga lea i totonu o lenei lava malumalu mo le faamoemoe i le galuega fou. Na fausia lenei malumalu o se vaega faaopoopo o le falesa tuai ia Oketopa 1977, ae tatalaina e avea ma fale fou mo tapuaiga i le Atua ia Setema 1978, o le vaitaimi foi lea ua amata ona toatele le mamalu o le atunuu e nofoia le aai tele i Otara.
O le sauniga na taitai e le tausi matagaluega, faatasi ai ma nisi vaega o le sauniga sa taitaia e le susuga a Suivaaia Te‘o ma Utumau‘u Pupulu (o nisi o lupe-faalele a le matagaluega o loo galulue i fafo atu o Otara), ma le Tusi Paia sa faitauina e nisi o le matagaluega, ae o le talaaga ma le laugaina o le Talalelei, sa nafa lea ma le susuga a Asofiafia Samoa Saleupolu, o se tasi foi o faifeau sa tausia le matagaluega lenei i tausaga ua mavae.
E uiga eseese lenei sauniga i auala sa faatino ai:
Sa iai se vaega faapitoa o le sauniga e manatua ai i le agaga faafetai i le Atua, ē na taulamua i galuega amata o lenei lava falesa, faapea i latou ua fai-i-lagi le folauga aemaise foi o ‘taulaga soifua’ na fofoa mai lo latou valaauina mo le Talalelei i lenei lava falesa ma le matagaluega i tausaga ua mavae.
O le isi vaega tāua o le sauniga, o le ‘Faataimuaga o le tuuina i lalo o le Malumalu’, o le vaega lenei sa faatino i fafo o le falesa. O le talepeina o le malumalu, ua avea ma faailoga o le masofa o le tagata tuai o le soifua tapuai o tagata o le matagaluega.
Ma le isi vaega o le ‘Folasaga o le faamoemoe fou o le Matagaluega’, o le faailoga o le faafouina o le malaga o le Faatuatua, o nisi ia o vaega faaopoopo o le sauniga. Peitai o nei vaega uma o loo fesootai lelei i le Autū o le lauga; Sakaria 4:6; “E le o le fitafita, e le o le malosi, a o lo’u Agaga, ua fetalai mai ai le Alii o ‘au”. O le luitauina foi lea o le ola faaleagaga o tagata o le Ekaleisa i le agai atu i le lumanai.
O nisi vaega otooto o galuega i lenei lava falesa e aofia ai i latou nei ua valaauina e avea ma faifeau; Sifa Hinago, Matamua Ulufotu, Fereti Faafuata, Iakopo Faafuata, Avau Faafuata, Suivaaia Te‘o, Faleatua Faleatua, Utumau‘u Pupulu faatasi ai ma Alaivae Aiolupo ma Fereti Gasu Tolovaa o nisi sa avea na faifeau sa galulue i lenei falesa.
O faifeau sa tausia lenei matagaluega; Roger Gibson (1977-1982), Siologa Lemalu (1983-87), Siauala Amituanai (1988-1991), Salafai Mika (1992-1995), Asofiafia Samoa Saleupolu (1996-2003), ma Faiva Alaelua (2004 ) o loo tausia le matagaluega i le taimi nei.
I le mae‘a ai o le sauniga na saunoa ai le tofa a Fiu Nili (failautusi o le matagaluega) e valaaulia ai i latou uma na auai mo le toonai tele na tapenaina e le matagaluega. O loo amata nei le galuega fou ma e lua vaega o le galuega; o le Malumalu, ma Vaega tuaoi o le falesa ma le hall. O nei vaega uma e fai faatasi ma le faamoemoe e lima masina e fausia ai.
(Na tuuina mai)
