“E lē toe foi le Malo ona ua ta‘uvalea soo i amioga lē taupulea”… Palemia
O le vaega muamua o tagata faigaluega faavaitaimi na malaga i Ausetalia, ua aliali mai ai ni tuua‘iga o le aafia o nisi i le faia o ni uiga o amioga lē taupulea ma solitulafono ma ua fai ma ila i taumafaiga a le Malo e apo ia avanoa faigaluega mo o tatou tagata mai Samoa.
O le ‘au tau mago lea e faapea na tupu mai ai ni faaletonu, ona o nisi ua faia uiga solitulafono ina ua tagofia le avamalosi e pei o le faaleaga o meatotino a kamupani e pei o taavale.
O nisi ua faia solitulafono e pei o le tosoteine ma le gaoi. O le feiloaiga a le Palemia susuga Tuilaepa Lupesoliai Sailele Malielegaoi ma tusitala na ia faailoa ai ia faaletonu ina ua fesiligia i se tulaga o iai galuega faavaitaimi poo seasonal work.
Ona o faaletonu ua vae manu‘a ai foi avanoa faigaluega faavaitaimi i Ausetalia, ua faia ai le faaiuga a le Malo e faamalosia ni suiga fou i le sailiga o tagata e fia maua ia galuega. O le a lē toe talia ni tagata i tua ona latou saili ni tagata ma ave mo ia galuega.
E pei ona silafia o nisi o autalavou ma ekalesia sa iai a latou fesootaiga ma nisi i le auina atu o tagata faigaluega faavaitaimi. Peitai o avanoa faapea o le a taofia ae o le a na o le Malo lava e sailia tagata ma faia faaiuga poo ai e talafeagai ona malaga.
O lona uiga o talosaga uma mai ia i latou e fia galulue faavaitaimi i Ausetalia ma Niu Sila o le a iloilo uma e le vaega o le matagaluega a le Palemia ma le kapeneta o loo nafa ma le sailia faapea le tapenaina o tagata mo ia avanoa faigaluega.
Faaalia e le Palemia o faaletonu ua aliali mai pea ma ta‘uvalea ai le igoa o Samoa i le polokalame e atagia mai e lilifa ia i latou o loo maua avanoa i fesootaiga ma tagata i tua, le mafuaaga o le a lē toe faia ai e nisi lea galuega ae ua na o le Malo.
O isi aiaiga fou o le lē toe maua lea e soo se tagata o se nuu ma se afioaga e fia talosaga mo ia galuega se avanoa, pe afai e maua ane i tagata ua malaga i fafo o nisi mai ia nuu ma afioaga ua solitulafono ma lē usitaia aiaiga o galuega.
Afai o ni faaletonu i aiaiga o le galuega ua soli, e tasi le tausaga o le a lē toe malaga ai nisi mai se nuu ma se afioaga ua faamaonia o nisi mai o latou alalafaga ua solia aiaiga a o iai i fafo. Afai ua matuia tele se gaioiga ua fai o le a faasala i le lua tausaga sea nuu ma se afioaga.
E lei faailoaina e le Palemia poo ai nuu o i latou na faia solitulafono i le ‘au tau mago na malaga i Ausetalia, ae na ia faaalia o le a faasala fua ai i latou e lei malaga ma o loo fai lea avanoa faigaluega e mafua ona o le leaga o amio a isi tagata mai ia nuu ma afioaga.
