Faamanatu le aso o tagata logonoa i Samoa

O le vaiaso atoa lenei ua faatautaia ai ni polokalame mo le faalauiloaina o le vaiaso mo i latou e logonoa o le lalolagi.
I Samoa lava ia o le faalapotopotoga o le SENESE lea e faatautaia polokalame o lenei vaiaso e pei ona tatala aloaia ai le vaiaso faapitoa e le afioga i le Minisita o Mataupu tau tina ma tamaitai, atinae o nuu ma aga fesootai, o ia foi o le Minisita o i latou e iai manaoga faapitoa, le afioga Tolofuaivalelei Falemoe Leiataua.
Saunoa le alii Minisita i le tāua o le sao o i latou e logonoa aemaise o le lagolago ua ave e le Malo ma Faalapotopotoga tuma‘oti ina ia aua ne‘i ta‘ueseina nei tagata mai i le aotelega o tagatānuu o Samoa.
O le SENESE o se tasi o faalapotopotoga e tolu o loo unaaia aoaoga o i latou e logonoa e pei ona aooga ai le fanau i le Kolisi o le Faatuatua i Vaitele, o nisi o loo ua aoaoina i le Loto Taumafai ma le Nuanua o le Alofa lea e nafa ma le faatautaiga o galuega e ofo atu mo i latou nei.
O le aso e agai atu ai sui o le SENESE ina ia mafai ona aoao atili le gagana a tagata logonoa (sign language) i le Ofisa o Leoleo, ofisa o Aoga ma isi vaega o Matagaluega a le Malo ma Faalapotopotoga tuma‘oti.
E faitau selau i latou ua resitalaina i lalo o polokalame a i latou ua logonoa i Upolu ma le motu tele i Salafai.
O le autu o le faamanatuga o lenei tausaga ua faapea ona agai ai i avanoa tutusa i galuega ma aoga mo i latou e logonoa ma o talafou a le TVOne ma le TV3 i lenei vaiaso atoa ua faatautaia ma le gagana mo tagata logonoa le sign language.
O se vaega lenei o taumafaiga o loo faapea foi ona unai e le Matagaluega o Aoga e ala lea i le polokalame ua ta‘ua o le Inclusive Education lea ua faamalosia ai aoga i totonu o le atunuu ona iai se vasega faapitoa mo i latou e iai manaoga faapitoa e pei la o fanau ua logonoa ma ua savali nei i le lima tausaga o ave le faamamafa i lea tulaga ma ua iai lava faiaoga ua aoaoina i le aoga faafaiaoga ina ia mafai ona aoao atu nei fanau.