E to‘a 19 i latou ua filifilia mai matagaluega eseese faapea ma i latou i le tulaga tau le aoaoga ma ē o iai manaoga faapitoa e fai ma sui o Samoa e auai atu i le usugafono lea e faatautaia i le vaiaso lenei i Noumea i Kaletonia.
O le faamoemoe ina ia iai ni polokalame saunia auā le siitia ai o le tulaga o le soifua maloloina o le tupulaga talavou i le atunuu faapea ma le Pasefika atoa.
O se vaega tele lenei o le faamanatuga o le Vaiaso o Tupulaga Talavou e pei ona amata faagasolo i Samoa i lenei vaiaso ma o loo iai se vaega tāua o lenei faamanatuga e faatatau i le unai lea o taaloga ina ia mautinoa le soifua maloloina o tupulaga o le atunuu ma ia faaauala atu ai foi nisi atinae i taleni e mafai ona maua ai lumanai manuia o tupulaga talavou.
O loo malaga faatasi le tupulaga talavou ua filifilia ma le Minisita o Matagaluega o Aoga, Taaloga ma Aganuu e molimauina lenei fonotaga ma na ia faamalosi au foi ile aumalaga o le a malaga atu mo lea faamoemoe.
Na saunoa le taitai Malaga ia Seletuta Visesio Pita, o le faauluuluga lea o le vaega o atinae o Tupulaga Talavou a le Matagaluega o Tina ma Tamaitai Atina‘e o Nuu ma Agafesootai i le tāua o lenei malaga i le maua ai e fanau o le atunuu o le malamalama i mafutaga faavaomalo, ma auala ua saili faatasi ai tali o nisi o mataupu o loo luitau ai tupulaga o le Pasefika i lenei vaitaimi.
O taaloga ua faaaogā e le tele o faalapotopotoga o autalavou ina ia agai i ai nisi o tupulaga e aveese ai mai i le ono ofi atu i nisi o potopotoga e tulai mai ai solitulafono ma aafia ai. O lenei fonotaga na amata ananafi i le aso 2 o Tesema e agai atu i le aso 7 o Tesema.
