O lagona o le fiafia ma le faafetai ina ua a‘e manuia faiva sa alo i ai le matua o faiva ma le aiga salemalama i le tāina o le tatau a le afioga ia Tuu Ofisa Telea ma lona faletua ia Talifaaifo Motiana Futi Telea.
O lenei galuega na amata mai le aso 11 o Novema seia oo i lona aso 25, e na o le 2 vaiaso ma aso sa faataunuuina ai lenei faamoemoe, ma samaina ai i le Aso Toonai ua mavae. O le susuga ia Tolauena Andre ma le talipisi sa faafoeina lenei faamoemoe.
O Tuu Ofisa o le alo o Alae ma le faletua ia Ioana Telea mai le afioaga o Mulivai, Siumu, Faleasiu ma Manono, a o le faletua ia Talifaaifo Motiana Futi o le alo e faasino ia Tausa Talifaaifo Onosai Futi ma le faletua ia Tausa Tulivao Futi e mai le alalafaga o Manono-tai, Safotu ma Fasitootai.
O le Club Orator sa faataunuuina ai lenei faamoemoe, sa amataina le polokalame i le sauniga lotu sa taitaia e le susuga i le faafeagaiga ia Arona Tuisega mai le ekalesia PIC i Otahuhu, a o le fofoga o le aso o le susuga i le faafeagaiga ia Faleu Tausa Futi.
O le tofa ia Ala Telea sa fai ma sui o aiga na lua e tu tootoo i le aso auā faaaloaloga mo le mamalu o le auvalaaulia.
Sa faamalieina foi le mamalu o le atunuu sa auai i taumafataga na tapenaina e le Chowtime le susuga ia Andrew ma le faletua ia Elsie mai Otahuhu.