E taga eseese se vaaiga sa iai le tapuaiga a le atunuu i Aukilani, i nofoaga matamata e tolu na faamaopoopo e nisi o tamalii o Samoa, e agai uma atu i ai le atunuu o ē na mananao e fia molimau ma tapuai faatasi le taaloga a le Manu Samoa ma le Olopeleki.
O le nofoaga a le kamupani faatau taavale, le G-Mana Wholesale Autos i Otahuhu, o le Car Clearance Centre i Otahuhu, ma le nofoaga a le Kalapu lakapi a le Aukilani Samoa Rugby Club i Otahuhu.
Na maitauina le alu soli o tagata matutua i tina ma tamā matutua, o tupulaga talavou e oo lava i le fanauiti. O toatele o i latou nei, e iai uma lava a latou Sky i aiga, ae ona o le agaga lava lea o le toatele o Samoa, na alu motu ai e sailia nei nofoaga auā o Samoa e fiafia e tapuai ma talie faatasi.
O le fale matamata a le Aukilani Samoa Rugby Club i Otahuhu, sa amata lava i le ‘ava faatupu a le atunuu; o nei tapenaga na saunia lava e nisi o tamalii o Samoa sa taulamua i lenei faamoemoe, le afioga ia Aiolupotea John Roache ma le faautautaga ia Leulumoega ia Teleiai Pa‘ū Edwin Puni ma le tofa ia Sooalo Setu Mua.
Sa auai foi ma saunoa ai le Minisita o Aoga, Taaloga ma Aganuu i Samoa le afioga Magele Mauiliu Magele, le Pule Sili Lagolago o le Matagaluega o Aoga, Taaloga ma Aganuu i Samoa, le afioga Luatua Seumanutafa Semi Epati, ae lē gata i lea o sui o le autusitala ma Televise e 5 sa auai.
Sa faafiafia ai ma le faili lauiloa a le Tepatasi e faanofo filemu ai le maimoa a le atunuu. Na lanumoana faasoloatoa totonu o le hall i laei a le atunuu aemaise ai o taumafataga na saunia e nei tamalii o le atunuu.
O le ata foi lena e tasi na iai le tapuaiga a le faletaavale a le Car Clearance Centre i Otahuhu, le Afioga ia Manuo Failautusi Manuo ma le latou foi vaega, ona o le lagolago lava i le Manu Samoa.
I le tapuaiga sa faia i le nofoaga a le G-Mana, le Afioga Galumalemana Tai Galumalemana ma le latou aufaigaluega, na matuā laulaututu faasolo atoa tagata matamata e oo lava i loomatutua ma toeaiina ua tau faanonofo i lalo i le fiafia i le osofai malosi a le Manu i lana taaloga, a o le mapu le aufaigaluega i le tufaina o le malu taeao i le koko Samoa ma le panikeke, faapea le BBQ na toe osofai ai le aoauli a o silamaimoa le taaloga.
I luga o fesootaiga i le facebook, o loo iai lagona faaalia mai nisi o Samoa mai isi itu o le lalolagi, o loo moomoo ai maimau pe ana faapena le maopoopo o ni tapuaiga sa faia i o latou atunuu aemaise vaega o loo toatele Samoa o loo nopiai ai. O aso faapitoa nei ma taimi o ni mea iloga e fai i le atunuu, e naunau uma ai soo se Samoa o loo aitaumalele atu i isi atunuu, e fia mafuta faatasi ma soofaatasi a latou tapuaiga e aiaiuli atu ai i mea o loo faia i le atunuu moni.
Na mataina uiga eseese o tagata tapuai, o isi ua sisiva ua tau faanonofo isi i lalo, aemaise ai lava le taimi na maua ai le sikoa a Samoa, na matuā galo faasolo atoa ai i le isi toeaina ana fualaau na inu. O le vaaaiga tāua i le maimoa a le atunuu ua mafai ona maua le avanoa e tapuai faatasi ai tagata matutua seia oo lava i fanau, ae ua filo atu ai ma tatou uso mai Tonga ma Fiti aemaise ai o tagata Initia sa auai i lea aso. E malolo le Manu Samoa i lana taaloga ae ua matuā malo i loto ma fatu o le atunuu, e lē gata i Samoa lava ia ae o le tapuaiga lea sa osi atu i Aukilani.
‘Koe suki a e kakou, kakou……’
O se agana pei e faaulaula, e mafua mai se tasi o alii e faalēatoatoa le malosi o lona mafaufau i Samoa, ae ua toe lalaga a‘e i mafaufau ona o se tulaga faaletonu na peiseai ua toe lapelapea ai se tasi o tapuaiga matagofie a le atunuu, le tapuaiga lea sa faia i le nofoaga a le kalapu lakapi a le Aukilani Samoa i Otahuhu.
E mae‘a le tapuaiga o le taaloga i le Aso Lulu talu ai, ae osofaia e le kamupani televise a le Sky nisi o tamalii sa taulamua i lenei faamoemoe, ua agiga ai i tusitusiga e pei ona iai i le upega tafailagi a le Herald (Friday Jul 10, 2015) e faapea, sa solitulafono le faatinoga o lena faasalalauga faatelevise, ona e leai se auaunaga a le Sky o lesitala ai mo lena kalapu ae o lea na matamata le tapuaiga a Samoa i le Sky.
Na ta‘ua ai i lea lipoti a le Herald se manatu o se sui sooupu a le Sky, o se gaioiga e ‘faagaoi’ lea na faia e le kalapu, ona ua latou avea ma faaaogā se mea e latou te lei totogia. O lena lava lipoti sa agai ai se lagona e peiseai sa suetupe tamalii o le atunuu na faamaopoopoina lena tapuaiga, ae faaaogā ai le auaunaga a tau alaata televise a le Sky.
Na maua se talanoaga a le sui o le nusipepa i se tasi o molimau faamoemoeina o lenei polokalame ae lē o finagalo e faailoa lona suafa, na ia ta‘ua ai, o le finagalo o le afioga ia Aiolupotea John Roache e pei foi ona ia tali ai i le Sky, o Samoa e lē gāoi ae fefaasoaa‘i, ma sa faamanino foi e lenei tamalii lana tautua ma lana auaunaga, e lē o se taimi muamua lea ua ia faia ai faapea.
E masani (Aiolupotea) ona aumai lana Sky ma lana decoder e faaaogā i lana kalapu i faaiuga o le vaiaso, lea foi la sa ia manatu ai e tatau ona aumai lana Sky ma le decoder e matamata faatasi ai le tapuaiga a le atunuu.
Ta‘ua foi e lea sui i le tusitala, ua peiseai ua matuā telē ma matuia lenei mataupu ona o aga lava a mea nei o le ‘au tusitusi, ae o lea ua faatoa malamalama lelei le Sky i le agaga tonu na fai ai lea tapuaiga faatasi a Samoa, se‘i vaganā ai o lea ua toe faamanino e le Sky le faiga e tatau ona faatulaga ai lea auaunaga a le televise.
I nisi o faamatalaga a le Sky e agai i le Herald i luga o fesootaiga (twitter), o loo faamanino ai e le Sky, e lē o iai sa latou fuafuaga e unai atili lenei mataupu i se isi laasaga e pei o le ave i le tulafono. Ua uma ona latou talanoa i sui o le kalapu e tusa ai ma tulafono ma aiaiga uma mo le totogia o ni avanoa e faaaogā ai lea auaunaga mo ni faiga faapisinisi (commercial subscriptions).
E oo foi i le itu o le totogia o se tau sa ta‘ua i le lipoti a le Herald e faapea, na faatonu e le Sky le kalapu e tatau ona latou totogia le $350 o le tau mo le masina atoa e faaaogā ai le Sky ma ia faaaogā mo masina e 12, peitai o loo ta‘ua i le tali a le Sky i luga o le twitter, e latou te lē o maumaua‘i e tāpā le tatau ona totogi e le kalapu lena tupe, ae ua na o se manatu o loo faatū atu i ai e manaia pe a latou faia.
E lei maua se avanoa e talanoa mai ma le afioga ia Aiolupo e tusa ai o lenei mataupu, ae i le talanoa atu i soo se Samoa sa iai i lea tapuaiga, e na o lagona o le fiafia ma le faafetai i le agaga tau lāgalāga i mea lelei o nei foi tamalii o le atunuu, sa latou silasila mamao ai ma tapena lea fuafuaga ina ia matagofie atili le tapuaiga a Samoa i Aukilani nei mo lana aulakapi o loo faamemelo i ai, le Manu Samoa.
Toatele nisi ua faailoa i luga o le facebook o latou lagona, afai ae unai atili e le Sky lenei mataupu, ua latou sauni foi e taofia loa pe tape a latou Sky ua lē toe fia auai.
Tasi lava le itu e tau lagona ai le faanoanoa o le sui na talanoa mai i le tusitala, ona e tau sāua i le faalogo e ui e latou te lē o fia apoina le pola motu i tua, e lei ‘asa foi lenei faamoemoe ma le ‘ati‘ati mai o le fili ma le tiapolo i sina vaega toaitiiti o nisi lava o tatou tagata, sa lei fia lagolagoina le galuega na faia e nei tamalii.
Afai la o ina lea sa tau faanenefua le mafaufau o le pulega a le Sky, ua sa‘o ai loa le fasa a le vale, ‘Koe suki a e kakou kakou’.
