‘Ou te talitonu i le Fomai o fomai e maua ai le ola.’ – Lise MarieTaei Aoese
O le 27 o tausaga o le tamaitai o Lise Marie Taei Aoese na maua ai e fomai i Waitakere le iuga o ana siaki masani, ua maua i le gasegase matautia o le kanesa. Na ia logoina lona tamā ina ua ia maua lea faamatalaga, ae tali lona tamā e aua le popole, e mafai lava ona oti nei ae ola taeao.
Sa toe faia le isi siaki ma o le tali lava lea e tasi ma le faaupuga e toe 4 pasene o loo lelei o lona tino e ola ai. Sa toe faatulaga lona avanoa i le falemai i Greenlane e toe fai ai le isi ana siaki, ma sa ia faamatalaina uma ai le result lea ua maua mai i le falemai i Waitakere, ae fai i ai le fomai, o lea ua sauni le Ambulance e ave ai o ia i le falemai i Aukilani.
Peitai sa ia talosagaina fomai e tuu atu se avanoa se‘i alu ai i lona aiga e tapena le malaga a nai ona mātua e o i Samoa. Na tali fomai, poo fea e sili ia te ia, poo ona mātua poo lona ola? Ae na talosaga lava i ai se‘i alu e sauni le malaga a ona mātua, ona tuu lea i ai e fomai le avanoa ma le faaupuga, ia ta le 4 ua oo i le falemai i Aukilani o lea ua saunia le moega mo ia. Sa toe foi ma lona tamā i le fale, ma tapena le malaga a ona mātua ma malaga ai loa i le isi aso na sosoo ai.
Ta‘ua e lona tuaa, le tamā ia Taei Aoese, e lei iai sona popole i le taimi na malaga ai i Samoa ae tuu lona afafine i le falemai, ma sa ia logoina le susuga i le faafeagaiga ia Richard Read, o lona afafine o loo i le falemai.
Sa vili atu lona afafine i Samoa ma faamatala atu nisi vaega o le mea o loo taoto ai i le falemai, ma na fesiligia foi e fomai pe aisea ua alu atu ai na o ia i le falemai ae lē o atu ona mātua ma nisi o lona aiga.
Sa fesili i ai pe iai se mea o tupu ae tali fomai, o se tala faanoanoa mo ia, e toe 6 masina o loo ola ai, sa toe o atu foi le vaega o le Renal Cancer ma ta‘u i ai e toe 4 pasene o loo ola ai. Sa toe logoina foi o ia o loo iai tagata e o atu e asi tagata tigaina ua lata ina oti, ae na tali i ai e lē manao i ai auā o loo manuia lava o ia i le alofa o le Atua.
O le foi mai ai o le malaga a ona mātua mai Samoa, sa o ai loa ma lona tamā ma amata fai togafitiga o lona kanesa, ae siaki atu e fomai e faigata ona fai se taotoga o le kanesa ona e faaletonu foi ona fatugao.
Sa toe logoina o ia e fomai o le a fai sona taotoga o se taotoga telē ina ia taumafai e tape ai le kanesa. Sa ia mafaufau i le Atua na faia le tagata ma tali ai i le fomai e leai sona taotoga e faia, o ona totoga na sau ma ia mai le Atua e toe foi lava ma ia i le Atua. O le molimau ola a Lise Marie o loo ola i lona faatuatua ma lona talitonu i vavega a le Atua, o loo fai na o le faamamāina o lona toto ae o loo maua pea lona malosi mai le Alii.
O le Aso Toonai ua mavae, 11 o Iulai 2015 o lenei ua atoa i ai le 30 o ona tausaga, ma sa tapenaina e ona tuagane mai Ausetalia ma lona aiga se taumafataga tele e fiafia faatasi ai ma faamanatu le atoaga o lona 30 tausaga, ae ua avea ai foi o se avanoa lelei e momoli ai lona loto faafetai i lana ekalesia AOG i Mt Roskill, faapea le susuga i le faafeagaiga ia Richard Read ma lona faletua aemaise o ona aiga uma i le nofo tatalo ma anapogi a o feagai ai ma ma‘i.
O lona talitonuga o le tapuaiga a mātua ma lona aiga ua fesoasoani malosi ia te ia ua toe faafoi mai ai lona malosi.
O le viiga maualuga o le Atua ina ua alaga lana auauna i saafiafiga a le faisalamo o Tavita, ‘Lo‘u agaga e, ia faamanu atu ia Ieova, aua foi nei galo se mea tasi o ana meaalofa, o lē faamaloloina ou ma‘i atoa uma, o lē faaolaina lou ola mai le tuugamau.’
O upu ia sa pepese faatasi ai le auvalaaulia, o aiga ma auauna a le Atua e patipatia ai le alofa ma le faamalologa a le Atua ia Lise Marie Taei Aoese. O se aso fiafia mo aiga uma ma le Ekalesia auā ua latou talitonu i vavega a le Atua; ua molimau foi Lise Marie o ia o loo ola i le faatuatua, ua talitonu foi i le Fomai o fomai e maua ai le ola.
