E ui o le malolo o le Toa Samoa i ‘ai 14-12 a le Kiwi i lana taaloga i Whangarei, ae ua iloa nei ua lē o toe tutusa ma tausaga ua tea sa masani ona lami faakirikiti ai Niu Sila ia Samoa. O le tulai mai o le faiaoga fou ia Matt Parish faapea le lotonuu o tama o le au lea ua vaaia ai le atoa o le malosi o le Toa.
E leai se Samoa i le lalolagi atoa e tapuai i le au a le atunuu e lei maimoaina ma faamalieina i le taalo a le au e ui o nai a latou sasi lava laiti faapea nisi o faaiuga a le alii laufali Maori ia Henry Perenara sa faitioina.
O Perenara foi lea sa video ref i le taaloga a Samoa ma Egelani lea na taulia ai sikoa a Egelani na knock on. E ui i lea na faamalosia le Toa i le masii atu o le tele o pasi tutumu mai Aukilani ma isi vaega o Niu Sila na masii atu e tapuai le au a le atunuu. I ripoti i le Aso Tofi sa faapea e 9 pasi ae i le aso o taaloga sa ripotia mai ai e atoa o le sefuluono pasi o le aumaimoa.
Na mataina taimi o le siva tau ma le haka i le mataita o au e lua ae na faia loa le taga lea e sesele ai e Kiwi le ua na faailoa e tama o le Toa ina ua uma le taaloga o le taimi lea na lilivau ai e matuā pue ma sasa Niu Sila i le puipuiga (defence). Na iloga lea i le amataga i le malosi o le tatou laina e taofi Vatuvei ma sesele soo se osofaiga lea na pasi tia‘i ai e Pita Hiku le polo ae tipi loa e Tautau Moga le pasipasiga a Niu Sila ma sikoa ai i le 80 mita mo ‘ai muamua 4-0. Na sosoo ai ma le sikoa mataina a Vidot i se kiki a Roberts ma sili ai le e 8-6 ae peitai na savili tele ma misi kiki a Tim Lafai.
O le minute 25 na taofia ai loa le taaloga ina ua galulu le Toll Stadium i le sunu‘iina e BJ Leilua o le alii o Kieran Foran lea na atoa le 10 minute o tau faaola. O le taimi lea na amata lē iloa ai e le Kiwi minoi i le malosi o le puipuiga a la tatou au lea e ta le ‘afa o sili 8-6. I le afa faaiu na sikoa mataina ai loa BJ Leilua i se osofaiga na tau ai lana tee malosi ia Shaun Kenny Dowall ma pasasa ai Dowall ae tatao e Leilua le polo a o taupeupe ai le toatolu o le Kiwi ma e lei manuia foi le kiki mo ai 12-6.
Na taufai malosi le tamomo‘e a au e lua ae mo le Toa o taimi uma lava e momo‘e ai Mose Masoe e toulu solo le puipui mai a le Kiwi, Isaac Liu sa malosi tele ana mita faapea Sauaso Sue, David Faalogo, Pita Godinet, Josh Maguire, Jesse Sene Lefao, Dominique Peyroux ma Frank Pritchard. Na sui atu foi Dunamis Lui ma sasao solo. O le laina i tua na o le lua foi polo pa‘u ia Tim Simona a o Vidot ma Moga sa malolosi ma o lana osofaiga mulimuli na semanu e toe sikoa ai ma malo le Toa pe ana lata i le laina poo se lagolago mai autafa e faatini.
E ui i lea o le sikoa faaiu a Niu Sila toe lima minute na faatoa manumalo ai ae ua mautinoa ua paso ma iso i le malosi o le Toa Samoa lea ua toe taliu mai i laufanua o Ausetalia mo le taaloga i Wollongong ma Ausetalia i le Aso Sa nei, 9 Novema e saili ai se tasi e taaalo ma Niu Sila i le Siamupini i Ueligitone i le vaiaso fou.
O nai nei alo o Samoa e pei ona faailoa i ai e le Afioga i le Ao Mamalu o le Malo le Afioga i le Tui Atua Tupua Tamasese Efi, “O i latou o suli o le atunuu ua tauaveina le fu‘a a le atunuu ma ua ofo lo latou tautua mo Samoa, ia Manuia outou faiva ma faamanuia le Atua” ua o latou faatuina nei lea matatia o le taua i Whangarei le aai o Maori lea na semanu e toilalo ai le Kiwi pe ana ova sikoa ma taunuu isi mau osofaiga.
Ma o se lesona lelei foi mo tupulaga fai a‘e, o oe o le Samoa pe e te fanau i Niu Sila, Ausetalia, Amerika poo fea lava, o oe o le Toa Samoa e lē o se Maori, palagi poo se aporiti, o lou faasinomaga ma lou toto o Samoa.
