O le vaitau o le 1987 faasolo mai i le 1989 na suia ai e le faigamalo a le afioga Tofilau Eti Alesana sa avea ma Palemia le tulafono o faasalalauga, ma tatala ai le faitotoa e faatu ai se isi leitio i Samoa. O le ualesi faasalalau lea a le afioga Maposua Rudolf Keil na faaaoga ai mo le taimi muamua i Samoa le alaleo o le FM. O le faatoa lua ai lea oni leitio faasalalau i le atunuu aua sa na o le leitio lava a le Malo le 2AP e faasalalau i le alaleo o le AM lea e oo mai lava i le taimi nei e leo suia.
Ina ua amata le leitio a Maposua na amata ai ona molimauina le iai o suiga i le faagaioia o tautua tau leitio i polokalame ma pesepesega. Ua amata ona faafofoga ai le atunuu i nisi ituaiga o fatuga tuai ma ua leva, aemaise o fatuga o pese o suiga o le talutalu fou o tupulaga o le atunuu. O le leitio a Maposua na amata ai ona tatala finagalo o le toatele ma faaali saoloto o latou lagona ini mataupu faasaga i le Malo poo nisi lava atinae i totonu o nuu ma afioaga ua le lelei.
E fou i le faafofoga a le Malo ia manatu vaovao gata o tagata aua o le tele o tausaga sa nao le tasi ai lava le leitio, e lei faalogoina ai ni manatu siisii faasaga ini pulega ma faiga faavae a le Malo ua lape ma le lelei ona faatino. Sa iai le talitonuga o nisi i lea vaitau o le amata ai o le leitio a Maposua a nei e liliu le Malo ma aveese le laisene ona ua vevela ma maaleale mataupu na faasalalau i luga o lea leitio. Peitai e lei tupu se tulaga faapea e oo mai lava i le taimi nei.
O molimau i le olaga galue o Maposua e maoae le maofa ai o le toatele auā o se tamalii faipisinisi e finau ma tele lona faatuatua e mafai ona ia ausia se tulaga maualuga ma sili atu.
O le Aso Tofi ua mavae na faamavae atu ai lona aiga ma ona alo aemaise o ana uo i lea tamalii na valaau iai lona Matai i le aso 12 o Me 2018. O le tala a se tasi o lona aiga na maliu Maposua ina ua see i le fale ta’ele o lona maota i Afiamalu. Na faamanavaina ana galuega e le maliu ma le oti ua 83 tausaga o lona soifua. O se tamalii e tele ana pisinisi e pei o le fale tifaga o le Savalalo Grand ma le Magik Cinema.
Sa faia foi lana pisinisi o le Motor Rewinder i Savalalo ma fai foi lana fale kalapu o le Penina. E maliu nei ua le toe iai ia pisinisi ua faatau ese, ae o lana leitio faasalalau o le Radio Polynesia ua lima alaleo. Ua faatau foi e Maposua ma ona alo le tautua televise o le TV3 sa umia ma faagaioia e se tasi lava o lona aiga le susuga Joe Keil. Ia manuia lau malaga Maposua.
