“Ou te tau sao atu lava afai o uiga ia o loo aliali mai ia outou folasaga, o lona uiga e le mafai ona outou galulue faatasi”.
“E tusa lava pe fia ni structure e toe aumai ae afai o le faiga lea o outou e le fia toilalo le isi i le tasi, toute fia pupule uma lava, e le taunuu le tatou auaunaga faasoifua maloloina ise tulaga manuia ma lelei”. E lei milia faauu upu a sui o le komisi suesue o loo iloiloina se faatulagaga e pulea ma faagaioia ai le auaunaga faale soifua maloloina pe a toe faatasia le Matagaluega o le soifua maloloina.
Na fofola ma tuusao manatu o se tasi o sui o le komisi le afioga Faamausili Dr Matagialofi a’o faafofoga sui o le sosaiete a fomai ma le sosaiete a tausi soifua faapea fomai nifo ma isi vaega o le soifua maloloina. Na mapuna i fafo manatu faaalia o Faamausili ona o folasaga poo submission sa tuuina atu e vaega eseese aemaise o fomai ma tausi soifua.
E feteenai ia auaunaga e lua ona e manatu fomai o le faatulagaga ua maea ona faataoto e le komiti galulue a le Malo o le faasinomaga tonu lea e tatau ona pulea ai le auaunaga. Peitai o loo feteenai ma se folasaga a le pulega o tausi soifua ma le sosaiete o tausi soifua. O loo finau le sosaiete a tausi soifua e ma le pulega o lea auaunaga o le faatulagaga ua taoto mai e lē o iai i le pulega tausi soifua.
O loo manatu foi lea ituvai o le galuega ua na o le tomai faafomai ua faatulaga mai i le pulega ae leai tausi soifua. Ua fesiligia foi e nisi o fomai sinia pe aisea ua le aofia ai i le structure o le a pulea ai le soifua maloloina nisi o itutino taua sa iai muamua a’o tasi le matagaluega.
O le folasaga a le sosaiete a fomai na faailoa ai tulaga faaletonu o loo tutupu i le auaunaga a le soifua maloloina amata mai i fomai e oo i tagata galulue e pei o le au kiligi, ma tausi soifua. Na faaalia ai le faanoanoa o le taitaifono le afioga Taulapapa Brenda Heather Latu, ma ia fesiligia ai fomai poo le a so latou lagona i tulaga o loo tutupu aua afai o le faiga lea, e le mafai ona maua e Samoa se auaunaga tau soifua maloloina e mafai ona sulu iai pe a aafia i gasegase.
Na manino le finagalo tali o se sui o le sosaiete a fomai le tofa Namulauulu Nuualofa Potoi. Na ia faaalia o le leaga o attitudes poo uiga ma amio a e uma o loo i le auaunaga o le tulaga sili lea ona faaletonu. E ioe Faamausili Dr Matagialofi o le pogai tonu lea o le le maua o se autasiga o vaega uma i le structure ua maea faataoto, ma o le pogai lea o le feteenai o lagona ma manatu.
O le Aso Faraile ua mavae na maea ai folasaga i luma o le komisi ma ua sagai atu nei le komisi e iloilo molimau ma folasaga uma, ma tapena loa se lipoti e tuuina atu i le kapeneta. O loo fuafua o Iulai e tatau ona faatino ai le toe faatasia o le auaunaga tau soifua maloloina.
