O se tausaga uigaese lenei i talafaasolopito o le aai i Hamilitone, ina ua tutu faatasi tagata Samoa uma i lea vaega o le atunuu, ma tapenaina sauniga uma e lagolagosua ai ia Samoa, ma le faamanatuina o lona 50 tausaga talu ona Tutoatasi.
E ui ina ua le malaga i Samoa le toatele o le mamalu o Samoa o loo alala ma papaao i Hamilitone, peitai o sauniuniga ma tapenaga, sa molimauina le faaali ai o le lotonuu moni, ma o so latou sao foi lea ia Samoa ma lona aso faamanatuina.
O vaega uma sa faatinoina, sa matua tumutumu ma auai tagata uma, e le gata i tagatanuu o Samoa lava ia, ae faapea foi le toatele o uso mai isi atunuu o le Pasefika, atoa ai ma sui o le Pulega a le aai (Council).
O le Fono Faufautua, faatasi ma sui mai Ekalesia Samoa e iva i Hamilitone lava, sa latou tuufaatasia le polokalame sa fuafuaina, ma na matua vaaia ma molimauina foi le lagolago a tagata uma o le aai, sa atili matagofie ai le faamoemoe.
O le Aso Toonai aso 2 o Iuni na amata ai le polokalame faatulagaina, ae sa faamae‘a i le Aso Gafua, le aso malolo o le Tupu Tamaitai o Peretania.
O le afiafi o le Aso Toonai e pei ona ta‘ua, sa faia ai se taumafataga tele, ma sa tumu i faafiafiaga eseese e pei o aufaipese sa lautogia ma aufaafiafia.
O le Maddison Nonoa Horsefield, Opera Singer, TBirds Quatet, JA Jazz, o le Asosi a tama ma teine Samoa mai le Iunivesite a Waikato, faapea le tamaitai faafiafia mai Samoa Cindy of Samoa, o nisi ia sa amataina le fiafia o le polokalame amata o le Fu‘a i Hamilitone.
O le Aso Sa, aso tolu o Iuni, sa toe foi ane ai le faapotopotoga o tagata Samoa, ma malo faaaloalogia, i sauniga tuufaatasi e pei ona faapolokalameina. O se sauniga sa molimauina foi le tumu, ma sa faataunuina lea i le nofoaga o le WINTEC i totonu lava o le aai.
O faafiafiaga faaleagaga foi sa fesuisuiai ai vaaiga i lea afiafi, sa tapenaina lea e ekalesia eseese i totonu o Hamilitone lava. O ekalesia Metotisi Samoa, EFKS, Assembly of God, Katoliko, Worship Centre, Aso Fitu, Mamona, ma le New Life, sa tuufaatasi uma.
O le Taitai o le sauniga o le susuga ia Pastor Taula Young o le Assembly of God, ae o le Lauga sa saunia e Rev Asora Onesemo, ma le Tatalo sa saunoa i ai Rev Anatu Reupena.
O le Aso Gafua, aso 4 o Iuni, sa sisiina ai loa le Fu‘a o le Saolotoga, mai le itula e iva i le taeao, ona sosoo ai lea ma le Sauniga faapitoa o le Sisiga Fu‘a.
Ona alo ava loa lea i le aliitaeao poo le Ava faaaloalo, e pei ona masani ai tu ma aga a le atunuu. Na mae‘a sauniga e pei ona ta‘ua, ona sosoo ai loa lea ma le savali tele sa faataamilo i le aai, ma o se vaaiga matagofie tele foi, ona sa muamua i luma le Fu‘a poo le Tagavai o le Malo o Samoa, ae muliumuli atu ai tua le anoano o le au faafafiafia e pei ona lautogia i lea foi taeao ma le aso.
O le Taitaifono o le Fono Faufautua, Asiata Maifea, sa faailoa lona finagalo fiafia tele ona o le tutu faatasi o tagatanuu o Samoa, ona o tapenaga ma le lagolagoina o lea aso taupoina.
Sa faamaonia mai e se tasi o tamaitai o le Komiti, le faletua ia Meta Tyrell e faapea, e silia ma le 2000 tagata Samoa, sa auai ane i le polokalame o le Fu‘a o lenei tausaga. Sa ia faaalia foi i le Samoa Times, o se tausaga tupito ma le tāua tele mo soo se tagata Samoa e le gata i Niu Sila, ae soo se vaega lava o le lalolagi, ma ua tatau ai ona tutu faatasi ma faailoa le tāua tele o lea aso faamanatu mo Samoa.
Sa latou faafetaia foi uso a Pasefika, ona sa vaaia ma molimauina le tuuina ane o la latou lagolago i fuafuaga uma sa faataoto mo tapenaga a le komiti ma le aai i Hamilitone.
