Fesili – Faamolemole pe mafai ona ou tapaina i lau lafoga lisiti o tupe ia e lafo i Samoa e tausi ai o‘u matua, ma fesoasoani e fai ai a matou faalavelave?
Tali – E lei oo lava le malamalama o le tulafono a Niu Sila ia tatou faalavelave faa-Samoa, aemaise le tausiga o nai o tatou matua ona e le lava le penisiona a Samoa. O le mafuaaga lea o lou tali atu faapea, o tupe alu nei ma lisiti o personal expenses, e le mafai ona maua ai se refund pe faaaoga i le failaina o lau lafoga.
Fesili – Na ou faitau i lau polokalame lea e sau i le pepa e mafai ona e fesoasoani mai e suesue pe maua sau refund?
Tali – Telefoni muamua le Ofisa o lafoga, ave i ai lau numera lafoga, ona talosaga lea i ai e lafo mai
lau “Summary of earnings” mo le tausaga lea na faauma ia Mati 2012. A maua loa le pepa lena, ona telefoni mai loa laia o le tatou ofisa.
Fesili – Ae a la‘u payslip mulimuli o Mati lea e tusi mai ai le aofaiga o lou totogi ma le lafoga o le tausaga atoa?
Tali – O le faalavelave, o le aofaiga o le lafoga lena e tusi mai i luga o lau payslip, o loo aofia ai i totonu ma lau ACC. Na o le summary of earnings e manino mai lava na o lau lafoga totogi ua uma ona toese le ACC.
Fesili – O le a le mafuaaga e ala ai ona vave maua mai refund a isi tagata lea na faila faatasi a matou lafoga. A o lea lava e lei taunuu mai la‘u refund?
Tali – A faapea na e totogiina se Tax Agent na te failaina lau lafoga, fai i ai e suesue poo iai se mafuaaga o le tuai mai o lau refund. E lei oo le faasologa a le Ofisa o lafoga ia i latou oloo maua pe lesitala mo le family assistance. E ono tasi lena mafuaaga. A faapea e iai ni au siea i se kamupani poo oe foi o se trustee poo se beneficiary o se Family Trust, seiloga e faila uma atu lafoga a le kamupani ma le Trust, ona faatoa mamulu mai lea o lau refund. A faapea na e failaina lava e oe ia lau lafoga, ia telefoni i ai e suesue pe ua taunuu atu au pepa. O nisi o a matou galuega na faila i luga o pepa e lei faaaogaina le initaneti, e telefoni atu i le Ofisa o lafoga, ae fai mai o le la e taatitia a matou pepa i totonu o le latou faila o mea sese. Ana le telefoni atu e le faasa‘oina mea sese ae taatitia ai lava.
Fesili – O a ea suiga fou lea o le a oo foi ia i tatou e tusa ai ma le Pakesi a le malo o lenei foi tausaga, lea e faaali soo mai i luga o le TV?
Tali – O le tausaga mulimuli lenei e mafai ai ona tapa le $310 mo pili o aoga faataitai, poo le totogi o se isi na te vaaia lau fanauiti a o e alu e te faigaluega. O le a le toe iai foi se tax credit mo i latou e i lalo ifo o le $9880 i le tausaga o latou totogi. Faapena foi ona aveese le tax credit mo le fanau e i lalo o le 19 tausaga o loo aooga tumau ae faigaluega pe a tuua le aoga.
Fesili – Ona o le maualalo o pasene tului mo nonoga tupe i lenei foi vaitaimi, na ou asiasi ai i le fale tupe e fesiligia pe mafai ona tatala le matou feagaiga lea sa sainia ia Ianuari o le 2008. O le tausaga lea na fai ai le nonoga tupe e faatau ai lo‘u fale le la e nofo totogi ai le isi aiga. Na fix i le 6.50% lau nonoga tupe, a o lea ua ou manao e sui i le 5.40%. O le tali a le fale tupe e mafai ona sui i le pasene maualalo, pe a totogi le sala $3000 o le “break fee”. O le mafuaaga o lenei sala, ona o Ianuari o le tausaga fou faatoa mafai ai ona tatalaina le feagaiga lea na ou sainia mo le lima tausaga. O le fesili e faapea, e mafai ona faaaoga lenei $3000 e faalaititi ai lau lafoga totogi?
Tali – Ioe, e faataga e le Ofisa o lafoga ona e tapaina le $3000 lea o tupe alu mo le faatamoeina o lou fale lena e nofo totogi ai le isi aiga.
