“E fai ma faamanatu le sailimalo a tina ma tamaitai ina ua mae‘a ona tapena faafafine toaga”
Samoa e, a saili i lo tatou tala faasolopito, e pinea le nofoaga o tina ma tamaitai; a saili i ou tala o le vavau ma tala tuu, e pine saofaga tāua o tina ma tamaitai; a saili foi i nafa ma matafaioi, e gagana le faiva alofilima a tina ma tamaitai; na oo lava i atunuu ese na fofola ai lou fala ona o le saili malo.
O le Aso Toonai, aso 24 o Aperila 2010, na tauaofai ai le faleono o le sinoti a Niu Sila i Saute i le itupa o le au uso fealofani mo le latou tausala sa faataunuuina lea i le matagaluega i Invercargill, lea o loo taitaia e le tausi matagaluega, susuga Masele Tolai ma le faletua o Vaimoa.
E tusa ai ma se faatofalaiga a le faletua o Vaimoa ma lana auso malosi, o le a talimalo i latou mo lea faamoemoe, ma o se uluai taimi lea ua ofaga potopoto ai Peresitene o auso, faletua mālōlō ma a latou auso taitasi amata mai Addington, Kalaiesetete, Halswell, Ashburton, Dunedin ma sagisagi fiafia ai i totonu o laufanua toafimalie o Invercargill.
E tusa ai ma fuafuaga a le sinoti aemaise lava o faiva alofilima o tina mo le sailimalo auā itu tau atiae pei ona faaiugafonoina e le Koneferenisi aoao a le auso, o le ala lea o le tapena faafafine toaga ma masiisii le latou matālalaga ona o le faaeaea i le Atua. Ina ua taunuu uma faigamalaga i le taeao o le Aso Toonai i le Pacific Island hall, sa saunia e le tofa ia Matuavao Masagaape Kuresa, matagaluega Invercargill, le upu faafeiloai mo le faleono aemaise nai alii faifeau sa feagai ma le faafoeina o sā mo le momoliina o le auso, ona alo atu lea i le ti taumafa manaia o lea taeao malulu.
Na soosoo loa ma polokalame o le aso, ma o le failautusi o le sinoti, Rev Ropeti Enoka sa tatalo amata ona faagasolo lea o le polokalame, o le tausi ia Vikili Matuavao Kuresa (Invercargill) sa fai ma fofoga o le aso, ae o le failautusi o le auso faasinoti, faletua Luisa Enoka sa feagai ma le faamaopoopoina o le taulaga foai faatasi ai ma le lagolagosua a faletua Tasileta Pese, Vaimoa Tolai & Fiapalagi Faalafi.
O polokalame faagasolo e lafo le ipu a le peresitene o auso taitasi i le taimi o lana sausaunoaga, ia ona saasaa lea o le latou tausala tofia a o lafoina le latou taulaga faitele, ma e ese le aulelei o nai tina matutua sa fai ma taupou o lea aso ia latou teuga feilafi ma pale fuiono, e lē gata i lea o faletua ma tina mālōlō i le vavai mai o itutino ma seesee ane i fika o le musika na faafoeina e le faifeau Invercargill Rev Masele Tolai.
Na faapena foi ona fai siva a sui o komiti tumau e pei o le faletua o Tina Lemaga (Addington), aemaise ai o aitema a auso taitasi, e lasi taga eseese na vaaia i nai tina ae na matuā uigaese ai faafiafiaga a le auso fou mai Ashburton, na o le toatolu le aufaafiafia, faletua Palagi Faalafi, Faavela Lia (Malie) ma le latou faaluma numera tasi o Uini Voli (Faleula), na sola ma le mea atoa.
E maeu le lima foai na faaalia i lea aso, ma o le tamaoaiga lava ia o le Atua e faasafua mai pea, matagofie foi si a latou taulaga na sasaoina.
Na alo atu i le taumafataga tele sa saunia lava e le auso toagaogao a Invercargill, ia poo le matagaluega lava lea o loo taitaia e Rev Masele Tolai ma le faletua o Vaimoa, o lenei aulotu e pei lava o se aiga e galulue fiafia tagata uma.
O le fetalaiga Matuavao Masaga Kuresa sa fetalai i le aso, ona tali fuaitau lea o le tulafale Mafuao Tuua e tusa ai foi ma le talileleia o le faleono e si nei tamai aulotu, e laititi ae maini.
Na faaiuina le aso i le tatalo na saunia e le susuga Poasa Leaupepe (Halswell) ma faafetaia ai le faigataulaga, o le afutoto ma le afu maligi o tina, e vaai alofa i le faigata o le soifuaga, ae o loo lagolago pea auā faalagamaea a le sinoti.
