E faatasi i le tausaga ma faamanatu e tina uma o Ekalesia EFKS i Brisbane lenei vaega, o le talosiaina lea o manaoga faapitoa o le Pasefika. E masani foi ona tuufaatasi tina uma o le matagaluega mo lea lotu faamanatu, peitai o le uluai tausaga lenei ua fai ai lava ekalesia ia.
O le tausaga ua mavae e pei ona silafia sa talosia ai tina ma tamaitai o le Atu Kilipati e pei ona tuuina mai ai o latou manaoga i le sauāina o tamaitai ma fanau teine talavou i uiga faasotoma.
Peitai o le tausaga lenei ua oo mai ai le talosiaga i le atunuu o Samoa e talosia ai e pei o faalavelave faalenatura.
Sa faatāuaina laei papae i le tausaga ua mavae peitai o le tausaga nei ua iai sina suiga laiti o laei sa faaaogāina, e pei o laei Samoa ma laei o isi atunuu.
E faamanatu lava e atunuu uma o le Pasefika lenei aso faapitoa e pei o Toga, Fiti, Samoa, Kilipati ma isi.
O le isi itu tāua, ona sa lei masani ona auai tupulaga tamaitai talavou peitai o le uluai tausaga foi lenei ua faafiafiaina ai i latou e tuu mai o latou tau‘au e galulue faatasi ma faletua ma tina uma i lea foi vaega.
E 5 ekalesia o le Pulega a Sisifo sa feagai ma polokalame i le po o le Aso Faraile, 30 o Aperila.
O le Ekalesia a Ipswitch o loo galulue ai le Toeaina Faatonu o le Matagaluega EFKS a Kuiniselani ia Rev Kerita ma le faletua ia Binary Reupena, sa latou faatinoina le tala faasamoa ia Nafanua.
O le Ekalesia a Brisbane o loo galulue ai le susuga i le faafeagaiga ia Rev Milo ma le faletua ia Talamasinei Faaleava sa latou faatinoina le sao tāua o tinā mai Tahiti i totonu o le tala lelei.
Sa faatinoina e le Ekalesia a West Side o loo galulue ai le susuga ia Rev Lance ma le faletua ia Satelite Tautiepa le sao tāua o tinā mai le motu o Toga, e lē gata ina faafeiloai i le gagana faa-Toga ae sa o latou laeiina foi laei o Toga ma siva faa-Toga.
O le Ekalesia a Centenary sa teteu mai o ni tagata Apoliki ma na pei lava o ni Apoliki mao‘i i le tavaliina o latou foliga.
O le ekalesia lea o loo tausia e Rev Makisua ma le faletua ia Nima Reupena. Sa faigata ona mateia poo ni Samoa poo ni Apoliki e i latou sa asiasi atu.
O le Ekalesia a Ipswitch Central sa o latou lagiina le pese faa-Samoa poo le faaevagelia e faatatau i le faatāuaina o aiga, ma o le autū foi lea o le po. O le ekalesia lea o loo nafa ma vaaia e Rev Aofaiga ma le faletua ia Lolo‘u Levi. Na matagofie foi tapenaga a Tina EFKS o le Pulega a Sisifo i lo latou sao tāua.
O le agaga moni e telē se tāua na maua mai ai ona o le lagolago faatasi o tina ma tamaitai aemaise le maopoopo foi o le tapenaina o vaega uma sa faatinoina. E toatele le auvalaaulia sa molimauina lea faamoemoe, aemaise o susuga i faafeagaiga ma tamā uma sa opogi taumafaiga a nai tina.
E moni lava e au lava le inailau a Tinā. Sa faataunuuina i le weekend muamua a o lumanai le Aso faapitoa mo tina, ona e tuuavanoa i Ekalesia uma ia latou tapenaga mo le aso o tina ina ia aua ne‘i iai se vevesi.
Na faaiuina i se taumafataga tele ma lūlū aao ai loa ma faatofā.
